У гэтую сераду Tesla выдаліла амаль усе вакансіі — больш за 3400 — у Паўночнай Амерыцы, заўважыў Business Insider. Цяпер на кар’ернай старонцы аўтавытворцы размешчана толькі тры — па адной у Каліфорніі, Невадзе і Тэхасе. Закрытыя пазіцыі таксама ў асноўным былі ў гэтых штатах.
Тыя вакансіі, што засталіся, мяркуючы з усяго, разлічаныя не на поўны працоўны дзень, хоць пазначана менавіта так. Усе яны — у навучальнай вытворчай праграме Tesla на тэрмін ад 7 да 16 тыдняў у мясцовых каледжах Каліфорніі і Невады, якая дасць удзельнікам магчымасць працаваць у кампаніі на пастаяннай аснове. У Тэхасе вакансія наогул пазначаная як стажыроўка на 4-6 тыдняў.
У Еўропе на сайце Tesla вісіць 28 вакансій, большасць — на гігафабрыцы ля Берліна. У іншых рэгіёнах адкрытых пазіцый у вытворцы электракараў няма.
Аднак на старонцы Tesla ў LinkedIn інфармацыя некалькі адрозніваецца. Тут станам на ўчора было выстаўлена 35 вакансій, уключаючы згаданыя ў Еўропе і ЗША. Яшчэ некалькі — у Дамініканскай рэспубліцы, але апублікаваныя яны на кітайскай.
Нядаўна BI паведамляў, што Tesla скасавала запрашэнні на летнюю стажыроўку ў сябе ўсяго за некалькі тыдняў да пачатку.
Замарозцы наймання папярэднічала буйная хваля звальненняў. Таксама кампанія страціла мінімум шэсць топ-менеджараў. Акрамя таго, яна амаль па ўсіх фінансавых параметрах недацягнула першы квартал, адклікала амаль усе 4 тысячы выпушчаных кіберпікапаў праз дэфект і ўступіла ў цэнавую вайну з кітайскімі канкурэнтамі, якія сталі аб’ядноўвацца для барацьбы з ёй.
Рэлацыраваліся? Цяпер вы можаце каментаваць без верыфікацыі акаўнта.