Threads нарэшце дазволіла выдаліць профіль без выдалення Instagram

Раней публікацыі Threads дубляваліся ў іншыя сацсеткі кампаніі — Facebook і Instagram. Цяпер карыстальнік можа змяніць спосаб публікацыі: для гэтага ў наладах прыватнасці трэба адключыць публікацыю пастоў у Instagram і Facebook. Аднак у стужцы гэтых сацсетак усё роўна будуць з’яўляцца публікацыі іншых карыстальнікаў з Threads.

Таксама ў карыстальнікаў з’явілася магчымасць выдаліць свой акаўнт на Threads без выдалення акаўнта ў Instagram, чаго раней зрабіць было нельга. Для гэтага неабходна адкрыць у наладах раздзел уліковага запісу і выдаліць профіль. Аднак для рэгістрацыі ў сацсетцы дагэтуль патрабуецца ўліковы запіс у Instagram. Абмен паведамленнямі ў Threads таксама ажыццяўляецца праз паштовую скрыню Instagram.

Распрацоўшчыкі плануюць зрабіць Threads сумяшчальным з пратаколам з адкрытым зыходным кодам ActivityPub, яго ўжо падтрымлівае іншая сацсетка Mastodon. Магчыма, гэтае змяненне аслабіць сувязь сэрвісу з Instagram. Паводле слоў кіраўніка Meta Марка Цукерберга, цяпер актыўная аўдыторыя Threads складае каля 100 мільёнаў карыстальнікаў. Мэта сэрвісу — 1 мільярд карыстальнікаў, лічыць бізнэсмен.