«TikTok-уцекачы»: у Duolingo выбух папулярнасці кітайскай мовы

Амерыканскія карыстальнікі TikTok пачалі актыўна вывучаць кітайскую мову на Duolingo пасля таго, як перайшлі ў кітайскую сацыяльную праграму RedNote (таксама вядомую як Xiaohongshu). Заканадаўства ЗША, якое ўступіць у сілу 19 студзеня (калі не будзе скасаванае Вярхоўным судом), прывядзе да выдалення TikTok з амерыканскіх крамаў праграм і спыніць працу праграмы на прыладах карыстальнікаў, калі яны не ўсталююць VPN-кліента.

Замест таго, каб абыходзіць забарону, больш за 700 мільёнаў карыстальнікаў TikTok перайшлі на платформу RedNote. На новай платформе амерыканскія карыстальнікі просяць дапамагчы ім з кітайскай мовай. Хоць некаторыя карыстальнікі мелі тэхнічныя праблемы пры рэгістрацыі ў RedNote, многія, здаецца, не турбуюцца пра тое, што кітайскія кампаніі збіраюць іхнія асабістыя даныя.

Паколькі RedNote распрацаваны для кітайскай аўдыторыі, яго мовай па змаўчанні з’яўляецца кітайская. Гэта выклікала рэзкі рост колькасці карыстальнікаў Duolingo ў ЗША, якія вывучаюць кітайскую мову. Згодна з Duolingo, колькасць новых карыстальнікаў, якія вывучаюць кітайскую мову, вырасла прыкладна на 216% у параўнанні з мінулым годам, з рэзкім скачком у сярэдзіне студзеня. У апытаннях Duolingo новыя карыстальнікі сталі часцей паказваць «TikTok» у якасці крыніцы інфармацыі аб праграме.

Duolingo жартаўліва адрэагаваў на гэта ў сацыяльных сетках, апублікаваўшы ў X пост: «Во, дык ЦЯПЕР вы вучыце кітайскую». Кампанія таксама размясціла ў TikTok відэа, якое рэкламуе сваю праграму для вывучэння кітайскай мовы. Адное з відэа, на якім талісман кампаніі, зялёная сава, накіроўваецца ў аэрапорт, набрала больш за паўмільёна лайкаў. Іншае відэа, прысвечанае навучанню кітайскім фразам для «ўцекачоў TikTok», атрымала больш за 620 тысяч лайкаў.