Forbes: ByteDance планавала выкарыстоўваць TikTok для сачэння за канкрэтнымі амерыканцамі

У рукі журналістаў Forbes патрапіла ўнутраная дакументацыя кампаніі. Следчыя высветлілі, што каманду маніторынгу — аддзел унутранага аўдыту і кантролю рызык ByteDance — узначальвае выканаўчы дырэктар Сун Е, які падпарадкоўваецца сузаснавальніку і генеральнаму дырэктару ByteDance Лян Рубо. Выданне сцвярджае, што каманда праводзіць расследаванні магчымых неправамерных дзеянняў былых і цяперашніх супрацоўнікаў кампаніі.

У двух выпадках група аўдытараў планавала збіраць даныя TikTok пра месцазнаходжанне грамадзян ЗША, якія ніколі не мелі працоўных адносін з кампаніяй. З матэрыялаў незразумела, ці былі насамрэч сабраныя даныя пра гэтых амерыканцах, аднак план заключаўся ў тым, каб каманда атрымлівала даныя пра месцазнаходжанне амерыканскіх карыстальнікаў з іх прылад.

Прадстаўнік TikTok Морын Шанахан заявіла, што сэрвіс збірае прыблізную інфармацыю пра месцазнаходжанне на аснове IP-адрасоў карыстальнікаў, каб «сярод іншага, дапамагчы паказваць карыстальнікам рэлевантны кантэнт і рэкламу, выконваць адпаведныя законы, а таксама выяўляць і прадухіляць махлярства». Аднак унутраныя дакументы ByteDance паказваюць, што мэты ў каманды ўнутранага аўдыту былі іншымі. Выданне не патлумачыла характару і мэт планаванага сачэння для абароны крыніц.

Каманда ўнутранага аўдыту і кантролю рызык ByteDance праводзіць рэгулярныя праверкі і расследаванні ў дачыненні да супрацоўнікаў TikTok і ByteDance на прадмет такіх парушэнняў, як канфлікты інтарэсаў і нямэтавае выкарыстанне рэсурсаў кампаніі, а таксама на прадмет уцечак канфідэнцыйнай інфармацыі. Дакументы, атрыманыя Forbes, паказваюць, што топ-менеджары, уключна з гендырэктарам TikTok Шоу Цзы Чу, загадалі камандзе расследаваць справы асобных супрацоўнікаў, нават тых, якія ўжо пакінулі кампанію.