Аддзел навін 8 красавіка 2024, 11:25

TIOBE: PHP губляе пазіцыі, скаціўся да мінімуму

PHP упаў на самы нізкі радок у TIOBE за ўвесь час: з 12-га ў сакавіку на 17-ы — у красавіку.

У 2001 годзе, калі з’явіўся рэйтынг, гэтая мова вось-вось мелася стаць стандартам распрацоўкі інтэрактыўных вэб-сайтаў. З часам яе папулярнасць расла: рынкавая доля РНР у пэўны момант пераваліла за 10%, а сама яна дабралася да 3 радка ў спісе. Пазней на рынку з’явілася шмат супернікаў — фрэймворкаў для вэб-распрацоўкі, такіх як Rails, Django і React (адпаведна на Ruby, Python і JavaScript). Акрамя канкурэнцыі, у РНР былі выяўленыя праблемы з бяспекай.

Мова пераўтварылася, сёння яна па-ранейшаму шырока ўжываецца ў вэб-распрацоўцы, на ёй пабудаваныя папулярныя сістэмы кіравання кантэнтам, напрыклад, WordPress. Але аўтары TIOBE адзначаюць, што хоць РНР дагэтуль запатрабаваная, яе найлепшыя дні прамінулі.

За месяц Fortran паднялася ў рэйтынгу TIOBE з 14 на 10 месца, Delphi/Object Pascal — з 15-га на 11-е, Ruby — з 18-га на 13-е. Scratch звалілася з 9 на 15 радок, MATLAB — з 13-га на 16-ы. R выцесніла з 20 месца COBOL.