Аддзел навін 8 студзеня 2024, 10:29

TIOBE назваў «мову года»-2023

C# стала «мовай праграмавання года» па версіі TIOBE ўпершыню больш як за 20-гадовую гісторыю рэйтынга.

Як адзначаюць аўтары, C# увесь гэты час уваходзіла ў дзясятку самых папулярных моў, а цяпер даганяе топавую чацвёрку. За мінулы год яна больш за астатнія павялічыла долю на рынку — +1,43%, чым і заслужыла тытул. На другім і трэцім месцы па прыросце — Scratch (+0,83%) і Fortran (+0,64%).

C# адбівае рынкавую долю Java і становіцца ўсё больш распаўсюджанай у такіх сферах, як гульнявая распрацоўка і бэкэнд вэб-праграм. C# бясплатная і стабільна развіваецца, паляпшаючыся з кожным рэлізам. Аўтары TIOBE лічаць, што неўзабаве яна нават можа абагнаць Java.

У рэйтынгу адбыліся і іншыя цікавыя змены. Напрыклад, Fortran і Kotlin трывала асталяваліся ў топ-20, выцесніўшы R і Perl, якія доўгі час уваходзілі туды. На думку аўтараў, у 2024 годзе ў топ могуць увайсці Julia, Dart і TypeScript.