Якіх інструментаў і сэрвісаў пазбавіліся ІТ-спецыялісты ў Беларусі. Спіс (абнаўляем)

Біржы працы

Upwork

З 7 мая папулярная ў фрылансераў пляцоўка для пошуку працы Upwork прыпыніла працу ў Расіі і Беларусі. Карыстальнікі з Расіі і Беларусі не могуць рэгістраваць новых акаўнтаў на Upwork.

З 1 мая рашэнне павінна было запрацаваць на поўную сілу — да гэтай даты ўсе рахункі па кантрактах з беларусамі і расійцамі (якія знаходзяцца на тэрыторыі падсанкцыйных краін) мусілі выплаціць.

Абмежаванні павінны былі закрануць толькі карыстальнікаў, якія працавалі на Upwork з Беларусі і Расіі. Але насамрэч сэрвіс блакаваў беларусаў, якія даўно жывуць за мяжой — і нават замежнікаў.

Як беларусу разблакаваць акаўнт на Upwork

Пра паспяховую спробу разблакаваць акаўнт напісаў аўтар тэлеграм-канала «Айці людзі» Андрэй Пакляк. З 14 лютага ён жыве ў Турцыі і мае турэцкае пасведчанне на права жыхарства, але Upwork усё роўна заблакаваў ягоны рахунак 15 красавіка. Каб даказаць сэрвісу, што ён не жыве ў Беларусі, Пакляк адправіў службе падтрымкі фота турэцкага пасведчання на права жыхарства і дамовы арэнды кватэры ў Турцыі, выпіску з карты з пералікам пакупак у Турцыі. Гэтага аказалася недастаткова.

Тады Пакляк прапанаваў Upwork наступныя віды верыфікацыі:

• Фота на фоне мора з пашпартам у руках і аркушам з указаннем актуальнай даты — «аджа ў Беларусі няма мора».
• Відэасустрэчу з прадстаўнікамі Upwork са шпацырам па турэцкім кірмашы, кальянам і паглынаннем супу з мозга.

Рабіць усяго гэтага не прыйшлося — біржа фрылансераў разблакавала беларусу акаўнт.

Freelancehunt

Украінская фрыланс-біржа спыніла рэгістрацыю карыстальнікаў з Расіі і Беларусі. Існуючым карыстальнікам замарозілі профіль і абмежавалі доступ да асноўнага функцыяналу, але пакінулі магчымасць вывесці сродкі.

Інструменты распрацоўкі

CircleCI

Інструмент бесперапыннай інтэграцыі, які выкарыстоўваецца камандамі распрацоўшчыкаў для стварэння, тэставання і разгортвання праграм на розных платформах.

Абмежаваў уліковыя запісы карыстальнікаў у Беларусі і Расіі.

Docker

Docker — праграмнае забеспячэнне для аўтаматызацыі разгортвання і кіравання праграмамі ў віртуальных асяроддзях.

Перастаў весці бізнэс з расійскімі кампаніямі, а карыстальнікі з Беларусі і Расіі не змогуць купляць падпісак.

JetBrains

Замарозіла продажы ў Расіі і Беларусі.

У лісце чытачу dev.by JetBrains паведаміла: сэрвіс часова прыпыняе прыём і апрацоўку заказаў, а калі тэрмін дзеяння падпіскі скончыцца, яе бясплатна падоўжаць на месяц.

JetBrains (раней — IntelliJ) стварае інструменты для распрацоўкі на мовах Java, Kotlin, C#, F#, C++, Ruby, Python, PHP, JavaScript і іншых, а таксама сродкі каманднай працы.

Qt

Фрэймворк для распрацоўкі праграм на C++ і Python. На пачатку сакавіка Qt Group абмежавала доступ да сваіх рэсурсаў карыстальнікам з Беларусі і Расіі. З сайта кампаніі знікла падтрымка рускай мовы.

Red Hat

Вытворца праграмнага забеспячэння на базе Linux прыпыніў продажы і аказанне паслуг бізнэс-кліентам з Беларусі і Расіі. У прэс-рэлізе паведамлялася, што забарона датычыцца кампаній, якія «базуюцца або маюць штаб-кватэры» ў Беларусі і Расіі.

Terraform

Інструмент для кіравання інфраструктурай. Чытачы dev.by паведамляюць, што сэрвіс не працуе ў Беларусі, як і ўсе прадукты кампаніі HashiCorp. Дапамагае VPN.

VMWare

Распрацоўшчык праграмнага забеспячэння для віртуалізацыі прыпыніў дзейнасць у Расіі і Беларусі. Забарона датычыцца «ўсіх продажаў, падтрымкі і аказання прафесійных паслуг» у абедзвюх краінах.

Рэпазіторыі

Gitlab

Gitlab — сэрвіс для кіравання рэпазіторыямі. Найбуйнейшы канкурэнт GitHub.

З 11 сакавіка прыпыніў працу «з новымі бізнэсамі з Расіі і Беларусі». Пры рэгістрацыі новага карыстальніка на Gitlab у спісе краін цяпер няма Беларусі і Расіі. Чытачы dev.by паведамлялі пра адключэнне ўжо існуючых акаўнтаў, але незразумела, наколькі гэта масавая праблема.

Воблачныя сэрвісы

Amazon Web Services

Больш не рэгіструе кліентаў з Расіі і Беларусі.

Чытачы dev.by паведамлялі, што сэрвіс цяпер нельга аплаціць картамі беларускіх банкаў.

Google One

Воблачны сэрвіс захоўвання даных Google One паведаміў беларусам, што іх падпіска неўзабаве стане недаступнай. Прычына: «апрацоўка плацяжоў з вашага рэгіёна ў цяперашні час не ажыццяўляецца».

Новы памер сховішча складзе 15 ГБ. Доступ да ўсяго, што захоўваецца ў Google-акаўнце, захаваецца.

Oracle Cloud

Oracle спыніла ўсе аперацыі ў Расіі і Беларусі.

Распрацоўка сайтаў і праграм

Adobe

Adobe спыняе новыя продажы сваіх прадуктаў і сэрвісаў у Беларусі. Такая заўвага з’явілася ў публікацыі кампаніі пра спыненне продажаў у Расіі.

Zendesk

Воблачная Service Desk-сістэма. Выкарыстоўваецца для арганізацыі зваротнай сувязі з карыстальнікам і службамі падтрымкі на сайтах і ў праграмах.

У сакавіку аб’явіла аб прыпыненні продажаў у Расіі і Беларусі. Існуючых кліентаў паабяцалі абслугоўваць да канца тэрміну падпіскі.

У канцы красавіка ад Zendesk былі адключаныя праграмы Альфа-Банка.

Цэнтры выдачы сертыфікатаў бяспекі

Амерыканская кампанія DigiCert спыніла выпуск усіх тыпаў SSL-сертыфікатаў для інтэрнэт-рэсурсаў з Расіі і Беларусі. Рашэнне набыло моц 10 сакавіка і будзе дзейнічаць да адмены санкцый.

Кіраўнік Мінлічбы Украіны Міхаіл Фёдараў паведамляў, што з Расіяй і Беларуссю перасталі працаваць і іншыя кампаніі, якія выдаюць сертыфікаты бяспекі: GeoTrust, Sectigo, Thawte, Rapid.

Таксама паведамлялася, што тэхнічныя праблемы ў рабоце беларускіх банкаў у сакавіку маглі быць звязаныя з сертыфікатамі.

Платформы і сэрвісы для арганізацыі каманднай працы

Miro

Платформа для сумеснай працы размеркаваных каманд Miro закрыла офіс у Расіі і спыніла продажы ў Расіі і Беларусі. Верагодна, забарона продажаў закранула карпаратыўных кліентаў. У прэс-рэлізе Miro адзначалася, што з індывідуальнымі карыстальнікамі ў Беларусі і Расіі платформа працягне працу.

TeamViewer

Распрацоўшчык праграмнага забеспячэння для аддаленага доступу да камп’ютараў TeamViewer заявіў пра спыненне працы ў Беларусі і Расіі.

Тэхніка 

Cisco Systems

Кампанія прыпыніла продажы абсталявання і праграмнага забеспячэння ў Расіі і Беларусі.

Cisco вырабляе абсталяванне для лічбавых сетак, мадэмы, маршрутызатары, камутатары, пункты доступу Wi-Fi, тэхніку для воблачных інфраструктур, сеткавыя рашэнні для інтэрнэту рэчаў і шмат іншага.

AMD 

Вытворца працэсараў і чыпаў AMD прыпыніў усе пастаўкі ў Расію і Беларусь.

Intel

Вытворца працэсараў і чыпаў Intel прыпыніў усе пастаўкі ў Расію і Беларусь.

Dell

Вытворца камп’ютарнай тэхнікі перастаў аказваць тэхпадтрымку ў Беларусі.