Топы Meta, OpenAI, Palantir атрымалі званні падпалкоўнікаў запасу ЗША

Тэхдырэктары Meta і Palantir — Эндру Босварт і Шьям Санкар, а таксама дырэктар па прадуктах OpenAI Кевін Вэйл і былы галоўны навуковы супрацоўнік OpenAI Боб МакГру атрымалі званні падпалкоўнікаў запасу. Яны прынялі прысягу ў мінулую пятніцу.

Босварт адзначыў, што гендырэктар Meta Марк Цукерберг падтрымаў яго рашэнне ўступіць у рэзерв. Той адзначыў, што ў Даліне вельмі шмат патрыятызму, і цяпер гэта пачынае праяўляцца.

Як піша выданне, гадоў дзесяць таму ІТ-кампаніі пазбягалі працы над тэхналогіямі, якія могуць быць выкарыстаны вайсковымі, ужо не кажучы пра службу. Новая праграма Рэзерву Арміі ЗША кажа аб паглыбленні сувязі Пентагона з тэхнаіндустрыяй.

Meta і OpenAI скарэктавалі палітыку ў бок пашырэння супрацоўніцтва з вайсковымі ў мінулым годзе. Нядаўна яны запартнёрыліся з абаронным стартапам Anduril, каб разам з ім рабіць прадукты для Пентагона. Palantir займаецца нацбяспекай ужо дваццаць гадоў, а таксама ў яго ёсць ШІ-праект для арміі, які, па некаторых ацэнках, каштуе больш за $1 млрд.

Першая ў сваім родзе праграма па прыцягненні тэхнарэзервістаў называецца Detachment 201 — адсылка да кода, які пазначае паспяховае стварэнне новага рэсурсу на серверы. Ініцыятары разлічваюць, што за Арміяй у гэтым плане падцягнуцца іншыя падраздзяленні амерыканскіх УС.

ІТ-рэзервісты будуць служыць каля 120 гадзін у год. У іх будзе больш гнуткасці, чым у іншых рэзервістаў — напрыклад, яны змогуць працаваць аддалена і па гнуткім графіку, а таксама будуць вызвалены ад вайсковай падрыхтоўкі (але будуць здаваць нарматывы фізпадрыхтоўкі і вучыцца страляць). Яны будуць заняты на праектах, напрыклад, па навучанні салдат выкарыстанню ШІ-сістэм або дадзеных аб здароўі для паляпшэння фізічнай формы. Акрамя гэтага, яны будуць кансультаваць вайсковых па закупцы тэхналогій і дапамагаць прыцягваць новых ІТ-рэзервістаў.

Працаваць на праектах, звязаных з іх асноўнымі кампаніямі, яны не будуць. Таксама ім будзе забаронена перадаваць сваім кампаніям якую-небудзь інфармацыю са службы і ўдзельнічаць у праектах, якія могуць даць ім або іх кампаніям фінансавую выгаду.