Трамп прыгразіў Apple мытамі ў 25%, нават калі перанясе вытворчасць з Кітая

«Я даўно паведаміў [гендырэктару Apple] Ціму Куку, што чакаю, што іх iPhone, якія будуць прадавацца ў ЗША, будуць вырабляцца і збірацца ў Злучаных Штатах, а не ў Індыі ці дзе-небудзь яшчэ. Калі гэта не так, Apple павінна будзе выплаціць ЗША пошліну не менш як 25%», — напісаў Трамп у сваёй сацсетцы Truth Social.

Зараз асноўная вытворчасць iPhone знаходзіцца ў Кітаі, хоць кампанія пачала дыверсіфікаваць сваю вытворчую базу, пераносячы магутнасці ў Індыю. Аднак аналітыкі папярэджваюць, што поўны перанос вытворчасці iPhone у ЗША можа значна павялічыць выдаткі. Аналітык Wedbush Дэн Айвс ацаніў, што iPhone, выраблены ў ЗША, можа каштаваць каля $3500 у параўнанні з бягучай цаной у $1000 за iPhone 16 Pro.

Раней The Wall Street Journal са спасылкай на крыніцы ў кампаніі паведаміла, што Apple разглядае магчымасць павышэння коштаў на новую лінейку iPhone, якая будзе прэзентавана восенню 2025 года. Кампанія баіцца напрасткі звязваць рост коштаў з тарыфамі ЗША на тавары з Кітая і шукае альтэрнатыўныя прычыны для апраўдання гэтага кроку. WSJ адзначае, што Apple плануе патлумачыць павышэнне коштаў з’яўленнем новых функцый і зменамі ў дызайне.

Нягледзячы на частковы перанос вытворчасці ў Індыю для амерыканскага рынку, найбольш прыбытковыя мадэлі высокага класа, такія як iPhone Pro і Pro Max, усё яшчэ будуць вырабляцца ў Кітаі, бо ў Індыі пакуль немагчыма наладзіць іх масавы выпуск. Apple таксама вывучае магчымасць пераносу часткі вытворчасці ў ЗША, але, па ацэнцы выдання, гэта зойме гады.

Падчас першага тэрміну Трампа генеральны дырэктар Цім Кук паспяхова справіўся з пагрозай увядзення тарыфаў, дамогшыся выключэння для прадуктаў Apple у 2019 годзе. Сёлета Кук неаднаразова сустракаўся з Трампам для абмеркавання тарыфаў, а таксама ахвяраваў $1 мільён у інаўгурацыйны фонд Трампа і прысутнічаў на цырымоніі інаўгурацыі ў студзені. Apple абавязалася інвеставаць $500 мільярдаў у эканоміку ЗША, у тым ліку ў вытворчасць сервераў для ШІ ў Х’юстане.

Apple сутыкаецца з дадатковымі праблемамі, у тым ліку з нізкім попытам у Кітаі, дзе кампанія нядаўна павялічыла стымулы для абмену старых iPhone на новыя. 1 мая кампанія паведаміла, што чакае дадатковых выдаткаў на тарыфы ў памеры $900 мільёнаў у бягучым квартале, пры гэтым Кук адзначыў, што перспектывы тарыфаў пасля чэрвеня «вельмі цяжка прадказаць».

Таксама Трамп заявіў, што можа ўвесці пошліны ў 50% на імпарт тавараў з Еўрасаюза з 1 чэрвеня. «Нашы перамовы з імі ні да чаго не прывялі. Таму я рэкамендую ўвесці прамы тарыф у 50% у дачыненні да Еўрасаюза з 1 чэрвеня 2025 года», — напісаў прэзідэнт у Truth Social.

«Іх значныя гандлёвыя бар’еры, ПДВ, недарэчныя карпаратыўныя штрафы, неманетарныя гандлёвыя бар’еры, валютныя маніпуляцыі, несправядлівыя і неабгрунтаваныя пазовы супраць амерыканскіх кампаній і многае іншае прывялі да гандлёвага дэфіцыту больш чым $250 мільярдаў у год, што з’яўляецца цалкам непрымальным», — дадаў ён.