Трамп справакаваў рост каціровак кітайскіх кампаній

Ганконгскі індэкс Hang Seng Index, у якім прадстаўлены найбуйнейшыя кітайскія кампаніі, з моманту інаўгурацыі Дональда Трампа вырас на 17% па стане на канец мінулага тыдня. Амерыканскі S&P 500 у параўнанні з пікавымі значэннямі лютага знізіўся на 9%, а кампаніі, што ўваходзяць у яго склад, страцілі $4 трлн рынкавай капіталізацыі.

З 2021 года інвеставаць у акцыі амерыканскіх кампаній у асноўным было выгадней, чым у іншых краінах. Але цяпер на змену парадыгме «TINA» (There is No Alternative), згодна з якой ЗША — найлепшае месца для інвестыцый, прыходзіць новая — «TIARA» (There Is A Real Alternative), што прадугледжвае наяўнасць рэальнай альтэрнатывы. Акцыі кітайскіх тэхналагічных кампаній з пачатку 2025 года падскочылі на 29%, дасягнуўшы максімуму больш чым за тры гады на першым тыдні сакавіка.

Прывабнасць кітайскіх акцый звязаная з іх таннасцю (яны гандлююцца на 30% ніжэй за ўзроўні 2021 года) — многія інвестары абпякліся, калі кітайскія ўлады пачалі жорстка абмяжоўваць ІТ-кампаніі падчас пандэміі, і да гэтага часу паводзяць сябе асцярожна. Магутны штуршок каціроўкам мясцовых айцішных кампаній даў ШІ-стартап DeepSeek і яго нашумелая разважальная мадэль R1.

Цікавасць да Кітаю расце не толькі дзякуючы ЗША — па словах экспертаў, інвестары выходзяць з рынкаў Паўднёвай Карэі і Індыі, якія таксама сутыкаюцца са складанасцямі. Тым часам у J.P. Morgan у апошнія тыдні фіксуюць рэкордныя аб’ёмы канверсіі амерыканскіх долараў і юаняў у ганконгскія долары, якія ідуць на куплю мясцовых акцый. А некаторыя інвестары скінулі ўсе амерыканскія акцыі ў сваіх партфелях пасля з’яўлення DeepSeek.