Tinder амаль усё. PM пратэсціравала некалькі дэйцінг-сэрвісаў і дзеліцца досведам

Дзяўчына адзначае, што шукала партнёра для сур’ёзных адносін, «сядзела ва ўсіх магчымых праграмах», таксама ейная анкета была ў двух беларускіх шлюбных агенцтвах. 

Luxy: «Людзі з багаццем пацвярджаюць свае даходы — мільянеры пазначаныя»

Спачатку Ульяна даслала нам у бот усяго адное слова — Luxy. Гэтай праграмай дзяўчына карысталася паўгода, два месяцы ў платнай версіі (кошт — каля $100 на месяц), затым бясплатна. Як яно ёй:

— Мужчыны насамрэч добрыя — відаць, што інтэлігентныя, разумныя (у адрозненне ад кантынгенту Mamba і Badoo). Фішка гэтай праграмы ў тым, што людзі з багаццем пацвярджаюць свае даходы — мільянеры пазначаныя. 

Не ведаю, наколькі ім зручна шукаць сабе нявесту, але асабіста мне зручна было камунікаваць з імі, як ні парадаксальна, не праз іхную фінансавую дастачу, а таму што цікава: крутыя захапленні, праекты. Мне ўдалося пагутарыць з інжынерам з Nasa і Максам Карцье. 

Mamba і Badoo: «Мэтавы партрэт — гэта нейкі «дальнабойшчык»

Пра Mamba і Badoo Ульяна кажа, што «гэта было жудасна».

— Вядома ж, там мужчыны былі з Мінска або мінімум з Беларусі. Але мэтавы партрэт [карыстальніка] — гэта нейкі «дальнабойшчык». Паспрабую растлумачыць: знешнасць на +10 гадоў старэйшая за фактычны ўзрост, нуль інтэлекту і брыдкія жартачкі, ніякіх мэтаў у жыцці, але ўсе гатовыя ажаніцца адразу. Мяне хапіла літаральна на пару тыдняў. 

З іх было адное спатканне, якое перарасло ў другую сустрэчу, але пасля ўсіх размоў па душах звялося да one night stand.

У Badoo Ульяне сустрэлася некалькі «неадэкватаў», якія пісалі, што «тут сядзяць толькі дзяўчаты лёгкіх паводзінаў». Айцішніца іх заблакавала. 

— Быў яшчэ адзін хлопец з Badoo, які проста запар задаваў мноства пытанняў, і пры першым несупадзенні адмовіўся працягнуць зносіны. Было дваякае пачуццё: даволі правільна, але няёмка — бо мы не на сумоўі. 

Tinder: «Добрыя людзі, цікавыя сустрэчы і гутаркі, але на сяброўскім узроўні»

Ульяна дадае, што «самы топ з усіх праграм, напэўна, Tinder» (выкарыстоўвала як бясплатную, так і платную версіі).

— Але я шмат разоў выдалялася з Tinder і аднаўляла акаўнт (свайго роду ветэран гэтага сэрвісу). І самае цікавае, што ў апісанні многія мужчыны пазначалі тое ж самае: «Вось я зноў тут, ізноў не губляю надзеі».

Чаму выдалялася — «ад нейкай унутранай безвыходнасці». 

Хоць плюсы таксама ёсць: «сяброўская тэма Tinder добра зайшла ў падарожжах. Я дадавала ў апісанне, што не шукаю рамантыкі, што ў горадзе ненадоўга — і таксама трапляліся вельмі добрыя хлопцы».

• У Мадрыдзе ў мяне было некалькі сустрэч з маладымі людзьмі з Tinder: адзін паказаў горад, пакатаў па асноўных месцах, пачаставаў абедам у добрай кавярні з мясцовымі стравамі. Дапамагаў з іспанскай увесь час. Іншы расказаў пра жыццё знутры (сам ён партугалец, у Мадрыд прыехаў па працы — ён фізік). 
• У Порту хлопец з Tinder правёў сапраўдную экскурсію — на працягу некалькіх гадзін расказваў пра горад і паказваў славутасці.
• У Будапешце мы хадзілі абедаць з маладым чалавекам, размаўлялі пра жыццё ў Венгрыі. 
• У Барселоне хлопец з Tinder ледзь не ўзяў на сябе ролю майго ахоўніка — усё вырашаў на іспанскай, падказваў, у якія раёны не хадзіць, навучыў, як схаваць тэлефон і гаманец.
• Нават калі я ў Віцебск ездзіла, мяне і там павадзілі па горадзе.
• У Піцеры я жыла месяц, і за гэты час наведала шмат класных мерапрыемстваў. Адзін хлопец нават без доўгіх гутарак падарыў мне білет на Чэмпіянат свету (сам не змог пайсці, а я марыла пра гэта). Гэты ж хлопец летась прыязджаў у Мінск, і ўжо я яго вадзіла ўздоўж праспекта і ў «Васількі».

І я заўсёды ведала, што ў выпадку нейкіх праблем або непрадбачаных сітуацый я магу напісаць мінімум пяці людзям, і яны дакладна дапамогуць. Гэта цудоўнае пачуццё, бо я заўсёды падарожнічаю адная. 

@zodier_bot і Tabier: «Не хапіла маркетынгу, каб прыцягнуць больш карыстальнікаў»

Ульяна паспрабавала таксама @zodier_bot і Tabier — беларускія боты для знаёмстваў. Ейны вердыкт: «Няблага, але нядоўга. І мне здаецца, ім не хапіла маркетынгу, каб раскруціцца і прыцягнуць больш карыстальнікаў туды». 

Аўдыторыя дэйцінг-ботаў, на думку дзяўчыны, — хлопцы, якім цікавае ўсё новае. «Было адчуванне, што сабраліся першыя ўдзельнікі, але ўсё яшчэ тэсціравалі, што ж гэта такое. У @zodier_bot хлопец прыехаў у Мінск на сустрэчу з іншай вобласці, мы доўга размаўлялі. А ў Tabier так атрымалася, што я знайшла заснавальніка — і там ужо мы абмяркоўвалі працоўныя моманты. Я расказвала, што палепшыць у праграме, і ў нас нават здарылася мерапрыемства па абароне іх стартапа».

Ульяна агаворваецца, што актыўна карысталася сэрвісамі ў 2020–2021 гадах, а цяпер не ведае, што там адбываецца. Ад мінулага года яна наогул не заходзіць у дэйцінгавыя праграмы — «я ў рэжыме адчаю», кажа дзяўчына. 

Чым, на думку айцішніцы, пасля 15 лютага замест Tinder будуць карыстацца беларусы, — «думаю, будуць спрабаваць забіваць у пошук што-небудзь у маркеце праграм, ну ці разаўюцца афлайн-мерапрыемствы, як eat & meet», — мяркуе яна.

Дзяліцеся сваім досведам з альтэрнатыўнымі Tinder сэрвісамі ў каментах.

Чытачы! Мы перажылі яшчэ адзін складаны год. У 2023 наша каманда працягвала сачыць за беларускім ІТ і трымала вас у курсе самага важнага.
Без вас у нас бы не атрымалася! Вы дзеліцеся з намі досведам і інсайдамі, расказваеце гісторыі, смешныя і сумныя, ствараеце дыскусіі — робіце ўсё, каб беларускае ІТ працягвала жыць нягледзячы на межы і адлегласці. dev.by быў і застаецца месцам сустрэчы нашых чытачоў, дзе б яны не знаходзіліся.

Мы працягваем працаваць, у тым ліку дзякуючы вам. Сёлета нам заданацілі 678 чалавек. Гэта неверагодна кранальна і значна дапамагае нам працаваць далей і верыць у будучыню dev.by. Але нам усё яшчэ патрэбная падтрымка. Вашыя данаты дапамагаюць выплачваць заробкі журналістам.

Даб’ём да 700? Падтрымайце нас:

— Праз Patreon

— Праз Donorbox (калі вы ў Беларусі)

— Крыптой, тут гаманцы.

Дзякуй!