Meta ставіць на камп’ютары супрацоўнікаў у ЗША новае трэкінгавае праграмнае забеспячэнне, якое фіксуе рухі мышы, клікі і націсканні клавіш. Дадзеныя пойдуць на навучанне ШІ-мадэляў. Пра гэта кампанія паведаміла супрацоўнікам ва ўнутраных нататках, з якімі азнаёміўся Reuters.
Meta ставіць на камп’ютары супрацоўнікаў у ЗША новае трэкінгавае праграмнае забеспячэнне, якое фіксуе рухі мышы, клікі і націсканні клавіш. Дадзеныя пойдуць на навучанне ШІ-мадэляў. Пра гэта кампанія паведаміла супрацоўнікам ва ўнутраных нататках, з якімі азнаёміўся Reuters.
Інструмент называецца Model Capability Initiative (MCI). Ён будзе падключаны да працоўных праграм і браўзера, а таксама перыядычна рабіць скрыншоты экрана. Мэта — навучыць мадэлі таму, з чым яны пакуль спраўляюцца горш за ўсё: выбар з выпадаючых меню, выкарыстанне гарачых клавіш, навігацыя па інтэрфейсе. «Менавіта тут кожны супрацоўнік Meta можа дапамагчы нашым мадэлям стаць лепшымі, проста выконваючы сваю звычайную працу», — кажа кампанія.
Гэта частка маштабнай праграмы па перабудове працоўных працэсаў вакол ШІ, якую Meta перайменавала ў Agent Transformation Accelerator (ATA). «Мы будуем будучыню, у якой агенты ў асноўным выконваюць працу, а наша роля — накіроўваць іх, правяраць і дапамагаць ім удасканальвацца», — растлумачыў CTO кампаніі Эндру Босварт. Прадстаўнік Meta удакладніў, што дадзеныя MCI не будуць выкарыстоўвацца для ацэнкі эфектыўнасці супрацоўнікаў — толькі для навучання мадэляў.
Паралельна Meta плануе скараціць 10% персаналу па ўсім свеце пачынаючы з 20 траўня і разглядае дадатковыя звальненні цягам года. Унутры кампаніі ўжо сціраюцца межы паміж пасадамі — на карысць універсальнага тытула «AI builder».
Юрысты глядзяць на тое, што адбываецца насцярожана. Прафесар Йельскага ўніверсітэта Іфеома Аджунва адзначае, што падобны маніторынг пераносіць на офісных супрацоўнікаў ступень сачэння, якая раней была ўдзелам кур’ераў і гіг-працаўнікоў. У ЗША федэральнага абмежавання на сачэнне за супрацоўнікамі няма — працадаўцу дастаткова толькі паведаміць ім пра факт маніторынгу. У Еўропе карціна іншая: на думку спецыялістаў, такая практыка можа парушаць GDPR. У Італіі электроннае адсочванне прадуктыўнасці наўпрост забаронена законам, а ў Германіі суды дапускаюць трэкінг націсканняў клавіш толькі ў выключных выпадках — напрыклад, пры падазрэнні ў сур’ёзным крымінальным злачынстве.
Рэлацыраваліся? Цяпер вы можаце каментаваць без верыфікацыі акаўнта.