Цукерберг: Facebook і Instagram ператварыліся ў мэсэнджары — людзі размаўляюць у прыватных паведамленнях

Выступаючы ў судзе, Цукерберг адзначыў істотнае зніжэнне долі кантэнту, якім карыстальнікі дзеляцца са сваімі сябрамі ў Facebook і Instagram. Паводле дадзеных Meta, час прагляду кантэнту ад сяброў знізіўся з 22% да 17% у Facebook і з 11% да 7% у Instagram з 2023 года. Цукерберг патлумачыў гэта тым, што карыстальнікі сталі радзей трансляваць кантэнт сваім сябрам, як гэта было раней.

Замест гэтага Facebook стаў «больш шырокай прасторай для адкрыццяў і забаваў». Гэта трансфармацыя звязаная, у тым ліку, са стаўкай Meta на кароткія відэа і зменамі ў алгарытмах рэкамендацый кантэнту. Кіраўнік Instagram Адам Масеры лічыць, што цяпер Instagram больш падобны на дадатак для абмену паведамленнямі, чым на платформу для распаўсюджвання кантэнту. Ён адзначыў, што большая частка ўзаемадзеяння карыстальнікаў перамясцілася ў асабістыя паведамленні.

Meta таксама выкарыстоўвае аргумент змены паводзін карыстальнікаў у сваю абарону ў антыманапольным пазове, які быў пададзены Федэральнай гандлёвай камісіяй ЗША (FTC). Кампанія сцвярджае, што Facebook і Instagram сутыкаюцца з жорсткай канкурэнцыяй з боку такіх платформаў, як TikTok і YouTube, і менавіта перавагі карыстальнікаў, а не антыканкурэнтныя дзеянні Meta, вызначаюць тое, як выкарыстоўваюцца гэтыя платформы сёння.

FTC абвінавачвае кампанію ў манапалізацыі рынку сацыяльных сетак шляхам набыцця патэнцыйных канкурэнтаў, такіх як Instagram і WhatsApp, з мэтай нейтралізацыі будучай канкурэнцыі. У сваю чаргу, Meta аспрэчвае гэтыя абвінавачванні. У выніку разгляду рэгулятар можа прымусіць кампанію прадаць Instagram і WhatsApp.