Цукерберг не ведаў, што надыдзе бум АІ. Але ўсё роўна запасся графічнымі працэсарамі

Алгарытм, які раней быў пабудаваны на аснове таго, на што быў падпісаны карыстальнік, ператварыўся ў складаную сістэму, якая фармуе рэкамендацыі на базе яго пераваг і «падцягвае» кантэнт з усёй праграмы. Менавіта такі механізм ужо дзейнічаў у TikTok, які развіваўся хутчэй за праграмы Meta.

У адным з нядаўніх падкастаў Цукерберг расказаў, што стаў скупляць GPU і трансфармаваць алгарытмы Meta і спадарожную інфраструктуру, каб Reels — аналаг TikTok — мог дагнаць яго.

«Ці ўяўляў я тады, што ўсё стане пра АІ? Мы думалі, што гэта будзе неяк звязана з трэніроўкай вялікіх мадэляў, але ў той час я быў цалкам засяроджаны на рэкамендацыях для Reels і іншым кантэнце. Гэта адкрывае вялізныя магчымасці для Facebook і Instagram — магчымасць паказваць людзям кантэнт, які ім цікавы, ад людзей, на якіх яны нават не падпісаныя», — сказаў Цукерберг.

На генератыўны АІ мільярдэр сур’ёзна звярнуў увагу толькі пасля рэлізу ChatGPT. Але дзякуючы прадбачлівасці кампанія выявілася падрыхтаванай да нечаканай АІ-рэвалюцыі, якую справакаваў чат-бот.

«Я паглядзеў на [тое, як прыйшлося даганяць TikTok] і падумаў: „Мы больш ніколі не павінны апынуцца ў такой сітуацыі. Таму давайце закажам дастаткова GPU, каб рабіць тое, што трэба для Reels і ранжыравання кантэнту і стужкі, але толькі ўдвая больш“. Бо мы звычайна зыходзім з таго, што на гарызонце з’явіцца нешта, чаго мы пакуль не бачым», — працягнуў Цукерберг.

Ён дадаў, што ў выніку ідэя падвоіць выдаткі Meta на GPU «на ўсялякі выпадак» цалкам апраўдала сябе — хоць і стала плёнам мноства мінулых памылак, якія больш не хацелася паўтараць. Падкаст сярод іншага быў прысвечаны новай версіі фірмовай вялікай моўнай мадэлі Llama 3.