Аддзел навін bel 6 чэрвеня 2025, 12:33

Турчын хоча надаць «дынамізм» росту ПВТ

Аляксандр Турчын правёў пасяджэнне Назіральнага савета ПВТ, старшынёй якога ён нядаўна быў прызначаны. Ён заявіў, што ПВТ павінен «рухацца наперад, выкарыстоўваючы новыя формы, новыя механізмы».

4 каментарыя

Аляксандр Турчын правёў пасяджэнне Назіральнага савета ПВТ, старшынёй якога ён нядаўна быў прызначаны. Ён заявіў, што ПВТ павінен «рухацца наперад, выкарыстоўваючы новыя формы, новыя механізмы».

Прэм’ер-міністр падкрэсліў, што, нягледзячы на цяжкасці, ПВТ працуе і расце. «Наша задача — надаць гэтаму росту адпаведны дынамізм. Шмат што мяняецца ў свеце, асабліва ў свеце лічбавым. Нам важна не адставаць, рухацца наперад», — дадаў ён.

Турчын гаварыў пра важнасць адукацыйных праектаў і падтрымкі навуковай супольнасці, каб больш маладых людзей у розных сферах эканомікі маглі атрымаць у ПВТ досвед і дапамогу ў паляпшэнні кампетэнцый.

«Сакратарыят парку павінен перабудавацца на больш актыўную, інтэнсіўную працу, усебакова аказваць рэзідэнтам (і не толькі ім) садзейнічанне ў развіцці», — падкрэсліў ён.

Новая кіраўніца ПВТ Ганна Рабава сказала, што гэта сігнал да больш пільнай увагі. «Трэба зрабіць чарговую пераацэнку, чэкінг, паглядзець на нашы моцныя і слабыя бакі, што трэба дадаткова развіць, што трэба скампенсаваць», — адзначыла яна.

Адзін з найважнейшых накірункаў — рэінвеставанне назапашанага патэнцыялу ў традыцыйныя галіны эканомікі. «Гэта сапраўды магутны рэсурс. Нашы кампаніі вельмі актыўна цікавяцца ўнутраным рынкам. Больш за палову кампаній заяўляюць пра цікавасць да ўнутранага рэсурсу. Гэта каля 2,5 тысячы рашэнняў, якія, як яны лічаць, могуць быць укаранёны ва ўнутраны контур. Мы будзем выбудоўваць нашу працу па адкрыцці празрыстага інтэнсіўнага канала паступлення ўсіх гэтых рашэнняў у нашы традыцыйныя галіны», — дадала Рабава.

Таксама яна звярнула ўвагу на ўзаемадзеянне з сістэмай адукацыі і абазначыла пункты росту. У ПВТ будуць рабіць намаганні, каб фарміраваць каманды распрацоўшчыкаў, бізнес-моладзі для рэалізацыі пастаўленых задач.