Тысячы пратэстоўцаў і дзясяткі гарадоў: рух Tesla Takedown правёў найбуйнейшую акцыю

Дэманстрацыі праходзяць з сярэдзіны лютага, але звычайна разрознена. У суботу адбылася першая спроба сабрацца адначасова каля ўсіх 277 шоўрумаў і сэрвісных цэнтраў кампаніі ў ЗША з разлікам ударыць па яе продажах.

Пратэст ахапіў кропкі Tesla ў Нью-Джэрсі, Масачусетсе, Канэктыкуце, Нью-Ёрку, Мэрылэндзе, Мінесоце, Каліфорніі і Тэхасе, дзе базуецца аўтавытворца. Актывісты трымалі плакаты з надпісамі кшталту «Сігналь, калі ненавідзіш Маска», «Не бролігархіі мільярдэраў» і «Маск павінен сысці».

На працягу дня дэманстрацыі пашырыліся за межы лакацый Tesla у буйных гарадах ЗША, у тым ліку Вашынгтоне, Чыкага, Індыянапалісе, Цынцынаці і Сіэтле, а таксама ў невялікіх гарадах у Вірджыніі, Пенсільваніі і Каларада. Як адзначае выданне, у некаторых гарадах з’явіліся нешматлікія групы контрпратэстоўцаў.

Арганізатары Tesla Takedown таксама планавалі правесці акцыі ў 230 гарадах іншых краін свету. У Еўропе яны не дасягнулі амерыканскіх маштабаў, але настроі падобныя. Напрыклад, некалькі дзясяткаў чалавек выйшлі ў Лондане.

Амерыканцы незадаволены масавымі скарачэннямі ў дзяржсектары, якія адбываюцца з падачы Дэпартамента эфектыўнасці ўрада, які ўзначальвае Маск. Некаторыя актывісты заяўляюць, што жывуць у «фашысцкай дзяржаве» і што бізнесмена трэба спыніць. Брытанцы абураныя яго ўмяшаннем у палітыку і жэстам, які ён паказаў на інаўгурацыі Дональда Трампа. У брытанскай сталіцы актывісты «ўпрыгожылі» зарадныя станцыі Tesla, а да гэтага — мясцовае метро.