Алеся Чапкевич bel 27 кастрычніка 2026, 17:43

У беларускіх аўташколах будзе ў 1,5 разы больш практыкі і сімулятары

У Беларусі карэктуюцца адзіныя праграмы падрыхтоўкі кіроўцаў, піша БЕЛТА са словаў прадстаўніка Міністэрства транспарту і камунікацый Андрэя Гладкага.

Пакінуць каментарый

Дадай у Google

У беларускіх аўташколах будзе ў 1,5 разы больш практыкі і сімулятары

У Беларусі карэктуюцца адзіныя праграмы падрыхтоўкі кіроўцаў, піша БЕЛТА са словаў прадстаўніка Міністэрства транспарту і камунікацый Андрэя Гладкага.

Начальнік упраўлення аўтамабільнага і гарадскога пасажырскага транспарту Мінтрансу растлумачыў, што ў Беларусі рэалізуюць меры ў павышэнні якасці падрыхтоўкі кіроўцаў, зацверджаныя ўрадам. Гэта прадугледжвае ўнясенне змяненняў у дзяржстандарты і адзіныя праграмы.

«Мы захоўваем колькасць гадзін навучання, але павялічваем колькасць гадзінаў на практычнае кіраванне», — адзначыў Гладкі.

Паводле плану — з 50 да 70 гадзін. Таксама пашыраюцца магчымасці выкарыстання сучасных тэхналогій, у тым ліку сімулятараў, праграмных прадуктаў. У Мінтрансе разлічваюць, што дзякуючы гэтаму пачаткоўцы-кіроўцы будуць адказней паводзіць сябе на дарогах.

У стандартах на паслугі ў падрыхтоўцы, перападрыхтоўцы і павышэнні кваліфікацыі кіроўцаў ужо замацавана, што вучэбны транспартны сродак павінен быць абсталяваны сістэмамі відэа- і аўдыяфіксацыі. Аналагічныя падыходы дзейнічаюць і пры перавозках аўтамабілямі-таксі. Прычым фіксацыя павінна весціся як па кірунку руху, так і ў салоне аўта.

«Абавязковая патрабаванне — магчымасць аўдыязапісу, каб ацэньваць працэс навучання, пазбягаць канфліктных сітуацый навучэнцаў з інструктарам. Прадугледжана, што відэа і аўдыё павінны захоўвацца на працягу аднаго месяца», — адзначыў Гладкі.

Ён дадаў, што відэарэгістратары ў таксі дазволілі вырашыць шмат спрэчных пытанняў і павысіць дысцыпліну — такі ж вынік у ведамстве хочуць атрымаць у дачыненні да курсантаў аўташкол.

Акрамя таго, паводле правілаў, якія уступаюць у сілу 1 студзеня 2027 года, на тэматычным кантролі і практычным экзамене будзе праводзіцца відэафіксацыя. Відэарэгістратар будзе ўсталёўвацца на ўнутранай паверхні ветравога шкла і весці аўдыё- і відэазапіс дарожнай абстаноўкі з указаннем часу і даты, запіс дзеянняў навучэнца і інструктара, іх галасоў. Запісы будуць захоўвацца ў аўташколе шэсць месяцаў.