У некаторых блогераў у два разы ўпалі прагляды з-за навацый YouTube

Некаторыя аўтары відэа выказалі меркаванне, што гэта — частка вайны пляцоўкі з інструментамі для блакіроўкі рэкламы. У англійскага блогера Джоша Стайфа Хейеса, напрыклад, прагляды на ТБ, смартфонах і планшэтах засталіся на звычайным узроўні, а вось прагляды на ПК абрынуліся на анамальныя 50% з сярэдзіны жніўня. Аналагічнымі назіраннямі падзяліўся канал TechLinked.

YouTube ні ў чым падобным не прызнаецца. Але ўскоснае пацвярджэнне гэтаму знайшлося на даведачнай старонцы Google наконт «гледачоў, якія выкарыстоўваюць блакіроўшчыкі рэкламы і іншыя інструменты для блакіроўкі кантэнту». У паведамленні гаворыцца, што такія пашырэнні «могуць уплываць на дакладнасць падліку праглядаў». А ў каналаў, у якіх вялікая доля аўдыторыі выкарыстоўвае такія інструменты, могуць быць мацнейшыя ваганні трафіку, асабліва падчас іх абнаўлення.

Таксама кампанія адмаўляе, што прагляды маглі збіцца з-за новых ШІ-механізмаў YouTube для праверкі ўзросту карыстальнікаў. Кажа, што гэта можа быць звязана з «сезоннымі звычкамі» карыстальнікаў і канкурэнцыяй на платформе, але «сістэмнай» праблемы тут не бачыць.