Заснавальніца Wildberries пабывала на сустрэчы з Лукашэнкам — кампанія пабудуе ў Беларусі лагістычны цэнтр за $120 млн

На сустрэчу запрасілі амаль два дзясяткі прадстаўнікоў бізнэсу. Сярод іх апынулася заснавальніца маркетплэйса Wildberries Таццяна Кім. 

Лукашэнка расказаў, што яму нядаўна паступіў ліст з урада аб перспектывах Wildberries у Беларусі. Кампанія гатовая актыўна пашырацца на беларускім рынку і прадаваць. 

— Пытанне: што прадаваць? Мы імкнемся да імпартазамяшчэння. Наш рынак невялікі, але мы хацелі б заняць гэты рынак сваёй вытворчасцю. Калі так — калі ласка. Але яшчэ трэба ўлічыць адную рэч. Я не хачу, каб зніклі крамы крокавай даступнасці, маленькія крамачкі і гэтак далей. Не хачу, каб была манаполія буйных сетак, каб у кагосьці былі такія ўмовы, а ў кагосьці — гэтакія.

Але калі хтосьці мадэрнізаваўся і прасунуўся ў будучыню, а Wildberries працуе менавіта так (я ўжо баюся, што ўвесь гандаль неўзабаве пяройдзе ў інтэрнэт), такія прадпрыемствы мы будзем падтрымліваць. Але любое прадпрыемства мае працаваць на Беларусь, на дзяржаву. Тады ў мяне ніякіх не будзе да вас прэтэнзій, — заявіў Лукашэнка.

Таццяна Кім расказала, што Wildberries інвестуе ў будаўніцтва лагістычнага комплексу пад Мінскам на суму каля 11 млрд расійскіх рублёў (больш за $120 млн па бягучым курсе).

 — У нас 140 тыс. кв. метраў. Калі мы аперуем расійскімі грашыма, то ў нас на кожныя 100 тысяч квадратаў каля 8 млрд расійскіх рублёў, — цытуе заснавальніцу Wildberries дзяржагенцтва Белта.

Wildberries купіў у беларуска-кітайскім індустрыяльным парку «Вялікі камень» 27 га зямлі. Летась на гэтай тэрыторыі пачалося будаўніцтва лагістычнага комплексу. Чакаецца, што тут будзе створана каля 5-6 тыс. працоўных месцаў.