Навукоўцы выгадавалі «чалавечы мозг», які прыжыўся ў мозгу мышы і пачаў рэагаваць на святло

На гэты час навукоўцы навучыліся вырошчваць трохмерныя клеткавыя папуляцыі, якія імітуюць сапраўдныя органы чалавека. Арганоіды дазваляюць, напрыклад, вывучаць уплыў лекаў максімальна блізка да біяхімічных працэсаў у органах людзей без неабходнасці рызыкаваць здароўем пацыентаў у клінічных выпрабаваннях.

У мінулым кастрычніку навукоўцы Стэнфардскага ўніверсітэта навучылі арганоід мозга чалавека гуляць у камп’ютарную гульню Pong, а таксама імплантавалі тканкі арганоіда ў мозг нованароджаных пацукоў, дзе тыя паспяхова прыжыліся.

Даследчыкі з Каліфарнійскага ўніверсітэта ў Сан-Дыега развілі працу калег, паказаўшы, што ўкаранёныя мышам арганоіды чалавечага мозга здольныя рэагаваць на вонкавыя раздражняльнікі. У прыватнасці, тканкі арганоіда мозга былі імплантаваныя ў зрокавую кару мышэй.

Па-над клеткамі арганоіда размясцілі празрысты графенавы электрод, які дазволіў вывучаць тканкі мозга з дапамогай двухфатоннага лазернага мікраскопа. Гэта дазволіла ўбачыць, як крывяносныя сасуды мозга мышы пранікаюць у арганоід і пачынаюць сілкаваць яго ўсім неабходным для жыцця клетак. Электрычныя датчыкі графенавага электрода здымалі актыўнасць нейронаў у арганоідзе і ў роднай зрокавай кары мозга мышы.

Вопыт паказаў, што ўспышкі святла перад вачыма мышы суправаджаліся актыўнасцю тканак арганоіда. Прасцей кажучы, тканкі «чалавечага» міні-мозга ўжыліся ў структуру мозга мышы і пачалі браць удзел у яго працы па прамым прызначэнні — рэагаваць на вонкавыя раздражняльнікі. У дадзеным выпадку — на святло, што дазволіла ўпершыню ўпэўнена сказаць, што штучны мозг паводзіць сябе як сапраўдны. На такім мозгу можна будзе, напрыклад, выпрабоўваць новыя лекі і правяраць новыя методыкі. Гэта паскорыць пошук сродкаў для лячэння мноства небяспечных і смяротных хвароб.