Аддалены працаўнік плаціць 2K падаткаў у Беларусі, але ўсё роўна стаў «дармаедам». Як так?
Спойлер: вінаватыя нядаўнія папраўкі ў заканадаўства.
Нам напісаў чытач, які аддалена працуе на юрыдычную асобу ў РФ з невялікага беларускага горада. Два месяцы таму з камунальнай плацежкі ён даведаўся, што апынуўся ў спісе дармаедаў. Як так! — абураецца чытач, — бо я плачу падаткі ў Беларусі.
Наш чытач не ІТ-спецыяліст, а метадыст анлайн-адукацыі, аднак гэта неістотна: гісторыя можа стаць тыповай і для айцішнікаў.
Так, як расказаў чытач, ён працуе па дамове грамадзянска-прававога характару (ГПХ) аддалена ў расійскай арганізацыі, зарплату афіцыйна атрымлівае на банкаўскую карту. Раз на год запаўняе падатковую дэкларацыю і плаціць 13% падаходнага падатку ў Беларусі. Так, за апошні год выйшла каля 6500 BYN. Тым не менш два месяцы таму ён апынуўся ў спісе незанятых у эканоміцы. У камісіі па садзейнічанні занятасці патлумачылі: гэта таму, што «ГПХ не з’яўляецца кантрактам або працоўнай дамовай».
— На пачатку года мая дамова з выпіскай аб заробку ўсіх задавальняла, а цяпер яна ўжо не падыходзіць, — скардзіцца чытач. — Яны нават не захацелі зазіраць у тыя дакументы, што я прынёс. Начальніца аддзела (або гэтай камісіі) наогул сказала, што ім без розніцы, куды плацяцца падаткі.
Няма кантракта або працоўнай дамовы — значыць, дармаед. Але кантракт са мной могуць укласці толькі ў тым выпадку, калі я буду жыць у РФ.
У ІМПЗ чытачу таксама нічым не дапамаглі.
— Там адказалі, што могуць толькі выдаць даведку аб выплачаных падатках, а чаму я стаў дармаедам, яны і самі не ведаюць.
Атрымліваецца, грамадзянін Беларусі жыве ў Беларусі, працуе і плаціць дзве тысячы долараў па курсе ў бюджэт Беларусі, але пры гэтым з’яўляецца… дармаедам.
Чалавек у аблвыканкаме інкогніта параіў фіктыўна ўладкавацца на працу. Але гэта ж маразм! Што рабіць?
Мы параілі звярнуцца ў камісію не вусна, а пісьмова, прыклаўшы даведку аб выплачаных падатках, але не факт, што гэта дапаможа. Рэч у тым, што ад 1 лютага 2024 уступіла ў сілу вялікая частка палажэнняў пастановы Саўміна № 53, якая яшчэ больш пастрожыла крытэрыі аднясення грамадзян да незанятых у эканоміцы. Так, да тых, хто «працуе на тэрыторыі краін ЕАЭС», цяпер адносяць толькі людзей, з якімі ўкладзеная працоўная дамова (кантракт). Дагэтуль было дастаткова дамовы ГПХ — пры ўмове, што па ёй выплачваецца даход.
Верагодна, сэнс быў у тым, каб адсеяць са спісу занятых тых, хто знаходзіцца за мяжой на «вольных хлябах». Аднак жа трапілі па тых, хто не толькі жыве і працуе ў краіне, але і сумленна плаціць тут падаткі.
Каго яшчэ могуць закрануць папраўкі?
Айцішнікаў, якія працуюць на РФ і іншыя краіны ЕАЭС па дамове ГПХ. Такіх нямала. Аднак для іх, здаецца, пакуль ёсць выйсце — пераходзіць на ППД. Падаткавікі не раз тлумачылі, што артыкул 7, «аб працы праз інтэрнэт» (Закона РБ ад 30.12.2022 № 230-З «Аб змене законаў у пытаннях падаткаабкладання»), прыдуманы якраз для іх. Што рабіць тым аддаленым працаўнікам, чыя дзейнасць не падпадае пад ППД, незразумела.
Читать на dev.by