У аўстралійскіх офісах Binance прайшлі ператрусы

Паводле звестак Bloomberg, ператрусы звязаныя з магчымымі парушэннямі заканадаўства ў аперацыях з дэрыватывамі. Раней органы рэгуляцыі еўрапейскіх краін, ЗША і Аўстраліі пастрожылі кантроль дзейнасці Binance. Некаторыя банкаўскія партнёры адмовіліся ад супрацоўніцтва з крыптабіржай, што абмежавала яе магчымасці па абслугоўванні кліентаў.

Паводле слоў заснавальніка Binance Чанпэна Чжаа, «вонкавы ціск» нанёс шкоду кампаніі. «Многія з гэтых рэчаў знаходзяцца па-за нашым кантролем, але ў кароткатэрміновай перспектыве яны аказваюць негатыўны ўплыў на наш бізнэс», — паведаміў ён. Паводле даных CCData, глабальная доля платформы ў спотавым гандлі крыптавалютамі чацвёрты месяц падае, дасягнуўшы мінімуму ў 42%.

Сёлета ў красавіку ASIC анулявала ліцэнзію Binance Australia на правядзенне аперацый з дэрыватывамі. Кліенты кампаніі страцілі магчымасць вываду сродкаў у мясцовай валюце з платформы пасля таго, як мясцовы фінансавы партнёр адмовіўся ад супрацоўніцтва. У чэрвені Камісія па каштоўных паперах і біржах ЗША (SEC) падала судовы пазоў да Binance у сувязі з меркаваным парушэннем закона пра каштоўныя паперы.