У Беларусі хочуць ускладніць працу замежных маркетплейсаў
Дзяржаўны мытны камітэт вынес на грамадскае абмеркаванне папраўкі ў закон аб мытным рэгуляванні, заўважыў Office Life. Сярод іх ёсць некалькі патэнцыйных навацый для электроннага гандлю. Дакумент апублікаваны на сайце Прававога форуму Беларусі.
Краіны ЕАЭС хочуць змяніць сістэму працы з замежнымі маркетплейсамі. У прыватнасці, прапануецца ўвесці паняцце аператара электроннага гандлю, які б прымаў тавары, што паступаюць з-за мяжы, захоўваў іх і аплачваў мытныя плацяжы.
Аператар прадстаўляў бы тут інтарэсы замежнага маркетплейса, але сам з’яўляўся б рэзідэнтам Беларусі. Для такіх юрыдычных асоб плануюць стварыць спецыяльны рэестр, і каб патрапіць у яго, трэба будзе выканаць пэўныя патрабаванні.
Колькі будзе такіх аператараў пакуль невядома — гэта кожная краіна ЕАЭС вырашыць самастойна. У Расіі, напрыклад, прапануюць наогул перадаць усю працу з замежнымі гандлёвымі пляцоўкамі «Пошце Расіі».
У законе таксама дакладна прапішуць парадак аплаты мытных збораў для тавараў электроннага гандлю, правілы надання адтэрміноўкі і растэрміноўкі па іх, а таксама тое, як і ў якіх аб’ёмах могуць спаганяцца пеня і працэнты па такіх таварах, і іншае. Абмеркаванне працягнецца да 2 траўня.
Читать на dev.by