У Беларусі павялічаць бюджэтнае фінансаванне інавацыйных праектаў
У Беларусі плануецца прыняць некалькі нарматыўных актаў, якія пашыраць магчымасці дзяржаўных структур фінансаваць навуковыя даследаванні і распрацоўкі. Таксама будзе ўніфікаваны кантроль за эфектыўнасцю такіх праектаў. Пра гэта піша БелТА са слоў старшыні Дзяржаўнага камітэта па навуцы і тэхналогіях Сяргея Шлычкова.
Паводле яго слоў, ужо знаходзіцца на ўзгадненні праект пастановы ўрада, які дазволіць павялічыць максімальную долю бюджэтнага фінансавання прыкладных навуковых даследаванняў і распрацовак высокатэхналагічнай прадукцыі з 50% да 75% ад кошту праекта.
З яго прыняццем дзяржаўныя структуры таксама змогуць фінансаваць да 100% выдаткаў на распрацоўку і мадэрнізацыю крытычных тэхналогій і тавараў. Зараз гэта не больш за 50%.
Акрамя таго, у 2025 годзе плануецца накіроўваць не менш за 50% сродкаў фондаў інавацыйнага развіцця тэхнапаркаў на фінансаванне інавацыйных праектаў рэзідэнтаў.
Шлычкоў таксама паведаміў, што ў бліжэйшы час плануецца ўкараненне інфармацыйна-аналітычнай сістэмы, якая дазволіць аператыўна аналізаваць ход выканання навукова-тэхнічных праграм. Ужо распрацаваны і праект пастановы Савміна, дзе прапісаны адзіныя падыходы да ацэнкі эфектыўнасці навуковай і навукова-тэхнічнай дзейнасці незалежна ад таго, якія праграмныя інструменты выкарыстоўваюцца ў распрацоўках.
Читать на dev.by