У ЕС папярэдзілі пра магчымую забарону Twitter праз новы закон пра дэзынфармацыю

Паводле слоў Баро, гэта звязана з законам пра барацьбу з дэзынфармацыяй у сеціве, які набывае моц сёлета ў жніўні. Міністр адзначыў, што Twitter «грае важную ролю ў грамадскіх дэбатах», але «дэзынфармацыя з’яўляецца адной з пагроз нашай дэмакратыі». «Я хачу, каб Twitter адпавядаў гэтым еўрапейскім правілам 25 жніўня, інакш ён больш не будзе вітацца ў Еўропе. <…> Мы не можам рызыкаваць тым, што гэта паўплывае на нашыя публічныя дэбаты», — падкрэсліў міністр.

Раней у маі Twitter выйшаў з добраахвотнага пагаднення з ЕС у барацьбе з анлайн-дэзынфармацыяй. Аднак забавязанні сацсеткі захоўваюцца. «Ты можаш уцячы, але ты не можаш схавацца. Акрамя добраахвотных забавязанняў барацьба з дэзынфармацыяй стане юрыдычным забавязаннем у адпаведнасці з [новымі правіламі ЕС па барацьбе з дэзынфармацыяй] 25 жніўня. Нашыя каманды будуць гатовыя да прымусовага выканання», — заявіў еўракамісар Цьеры Брэтон.

Закон прадугледжвае ў тым ліку забавязанне выдаляць незаконны кантэнт і забараняе рэкламу, арыентаваную на непаўналетніх. Таксама платформы будуць абавязаныя павысіць празрыстасць і падаваць справаздачнасць наконт мадэрацыі кантэнту. За парушэнне правілаў Еўракамісія можа накласці штраф у памеры да 10% ад агульнага сусветнага абароту кампаніі за год або да 20% у выпадку паўторнага парушэння патрабаванняў.