У беларускім ІТ усплёск звальненняў і адначасова рэкорднае найманне

Паводле звестак Белстата, усплёск звальненняў у ІКТ прыпаў на апошнія два месяцы лета. У ліпені кампаніі сектара «інфармацыі і сувязі» звольнілі больш за 1,3 тыс. чалавек, у жніўні больш за 1,2 тыс. чалавек. Гэта на 20-30% больш, чым у маі–чэрвені.

Да гэтага ў сярэднім штомесяц з кампаній звальнялі крыху больш за 1 тыс. спецыялістаў. А больш за ўсё спецыялістаў было звольнена толькі ў сакавіку — амаль 1,4 тыс.

Пакуль складана прагназаваць, ці захаваюць кампаніі такі ж тэмп звальненняў восенню. Але сёлета звольненых менш амаль на 30%, чым летась. За студзень–жнівень кампаніі ІКТ звольнілі амаль 9,3 тыс. супрацоўнікаў. Летась за гэты ж перыяд звольненых было 13 тыс.

А вось наймаць яны сталі больш у гэтым годзе. Асабліва яны актывізаваліся ў ліпені-жніўні. Паводле звестак афіцыйнай статыстыкі, у ліпені кампаніі ІТ і сувязі ўзялі на працу больш за 1,2 тыс.спецыялістаў, у жніўні — больш за 1,5 тыс. спецыялістаў.

Гэта рэкордныя лічбы наймання сёлета. У параўнанні з папярэднімі месяцамі колькасць працаўладкаваных спецыялістаў у кампаніі ІТ і сувязі вырасла на 10-30%. 

Усяго за студзень-жнівень гэтага года кампаніі ІКТ узялі на працу амаль 9,7 тыс. спецыялістаў — на 30,5% больш, чым за такі ж перыяд мінулага года.

Раней першы намеснік міністра эканомікі Андрэй Картун заявіў пра рост колькасці айцішнікаў у Беларусі. Паводле яго слоў, кожны месяц колькасць айцішнікаў павялічваецца на 100-200 чалавек, нібыта адная з прычын — вяртанне ІТ-спецыялістаў.