У Кангрэсе ЗША забаранілі выкарыстоўваць WhatsApp
Служба кібербяспекі Кангрэса ЗША забараніла выкарыстанне месэнджара на ўсіх службовых прыладах супрацоўнікаў Палаты прадстаўнікоў. Прычынай сталі сумневы ў празрыстасці палітыкі бяспекі і абароне даных карыстальнікаў.
Згодна з унутраным мемарандумам, WhatsApp прызнаны «высокарызыкоўнай» праграмай. Адзначаецца, што месэнджар «не забяспечвае надзейнага шыфравання захоўваемых даных», мае ўразлівасці і «недастаткова раскрывае», як менавіта апрацоўвае карыстальніцкую інфармацыю.
Супрацоўнікам прадпісана «выдаліць WhatsApp з усіх урадавых прылад» і ўстрымлівацца ад выкарыстання месэнджара на камп’ютарах і смартфонах, падключаных да службовай інфраструктуры. У якасці альтэрнатыў кангрэсменам рэкамендаваны Microsoft Teams, Amazon Wickr, Signal, Apple iMessage і FaceTime.
Meta рэзка раскрытыкавала рашэнне, назваўшы яго несправядлівым. Прэс-сакратар Meta Эндзі Стоўн заявіў, што WhatsApp прапануе больш высокі ўзровень абароны, чым многія з аплікацый, дазволеных CAO (галоўным адміністрацыйным кіраваннем Кангрэса).
Стоўн таксама адзначыў, што WhatsApp выкарыстоўвае скразное шыфраванне па змаўчанні, таму Meta не можа бачыць перасланыя паведамленні. Раней у Сенаце ЗША абмежавалі выкарыстанне бясплатнай версіі ChatGPT, дазволіўшы супрацоўнікам звяртацца толькі да платнай версіі ChatGPT Plus. Было абмежавана выкарыстанне TikTok, DeepSeek і Microsoft Copilot.
Читать на dev.by