У Мінску ДАІ адсочвае парушальнікаў паркоўкі ў аўтаматычным рэжыме і рассылае лісты

Новы праграмна-апаратны комплекс пачаў працу 9 чэрвеня. Асаблівая ўвага надаецца цэнтральнай частцы горада і магістралям, дзе аўтамабілі, прыпаркаваныя з парушэннем ПДР, могуць прывесці да аварый і перашкаджаюць грамадскаму транспарту.

Тэхналогія з дапамогай камеры фіксуе парушэнне, фарміруе адпаведную пастанову і дасылае яе ўладальніку прыпаркаванага аўто па адрасе рэгістрацыі. Яна працуе ў межах загадзя вызначаных зон кантролю. Калі службовая машына ўязджае ў такую зону, на дысплеі ў салоне з’яўляецца спецыяльны сімвал. З гэтага моманту няправільна прыпаркаваныя машыны фіксуюцца і вызначаюцца іх каардынаты.

Службовае аўто рухаецца па адным і тым жа маршруце з вызначанымі інтэрваламі. Такім чынам тэхналогія разумее, напрыклад, якія машыны парушаюць правілы прыпынку (стаяць даўжэй за 5 хвілін). Макет парушэння фарміруецца з рэгістрацыйнага нумара няправільна прыпаркаванага аўто, яго месцазнаходжання і агульнага агляднага фотаздымку.

За першае парушэнне, выяўленае ў аўтаматычным рэжыме, прадугледжанае папярэджанне. Пры наступных цягам года — штраф 42 рублі (адна базавая велічыня).