У сусветным тэхсектары было звольнена амаль 245 тысяч чалавек у 2025

Найбольш скарачэнняў прыйшлося на ЗША: там было звольнена 170 630 работнікаў у 220 кампаніях, што складае амаль 69,7% усіх звальненняў. Далей ідуць Індыя (19 049) і Японія (11 608).

У Еўропе тэхнакампаніі скарацілі як мінімум 32 608 супрацоўнікаў — каля 13,5% ад агульнасусветнай колькасці. Мацней за ўсё пацярпелі Ірландыя, Іспанія і Швейцарыя — там у ІТ было скарочана прыкладна 11 500, 7 450 і 5 156 працоўных месцаў адпаведна.

Пры гэтым рэальныя маштабы звальненняў могуць быць значна вышэй, паколькі многія кампаніі публічна не каментуюць скарачэнні.

Аналіз паказаў, што прыкладна 69 840 скарачэнняў напрамую звязаны з укараненнем ШІ і аўтаматызацыяй. Адзін з самых прыкметных прыкладаў — Amazon, якая ва ўнутранай службовай запісцы ўказвала ШІ прычынай скарачэнняў персаналу. Ірландская кампанія Accenture ў рамках ШІ-ініцыятывы на працягу года скараціла 11 тысяч працоўных месцаў.

Нягледзячы на значныя скарачэнні ў Еўропе, іх маштабы саступаюць скарачэнням у найбуйнейшых амерыканскіх тэхгігантаў. У 2025 годзе Intel скараціла ў агульнай колькасці 33 900 супрацоўнікаў, за ёй ідуць Amazon і Microsoft. У суме гэтыя тры кампаніі ліквідавалі больш за 72 700 працоўных месцаў — больш чым удвая больш, чым усе еўрапейскія тэхнакампаніі разам узятыя.

Аналітык RationalFX Алан Коэн адзначае, што ў 2025 годзе кампаніі больш не абмяжоўваліся кароткатэрміновымі карэкціроўкамі, а пачалі фундаментальна перабудоўваць свае структуры. Хоць макраэканамічныя фактары накшталт высокіх працэнтных ставак, гандлёвых абмежаванняў і геапалітычнай няпэўнасці таксама ціснуць на бізнес-асяроддзе, ключавым драйверам скарачэнняў, паводле слоў Коэна, стала хуткае ўкараненне аўтаматызацыі і ШІ: «У адрозненне ад папярэдніх хваль звальненняў, выкліканых залішнім наймам, многія скарачэнні ў 2025 годзе насілі пастаянны характар, паколькі цэлыя ролі знікалі ў рамках ШІ-цэнтрычных аперацыйных мадэляў».

Нягледзячы на велізарныя інвестыцыі ў аўтаматызацыю, яна не заўсёды прыводзіць да імгненнага росту эфектыўнасці. «У 2026 годзе таксама не варта чакаць рэзкага спынення скарачэнняў. Структурныя фактары — аўтаматызацыя, стратэгічныя змены і эканамічная асцярожнасць — указваюць на тое, што звальненні працягнуцца прынамсі да першага квартала, нават калі ў асобных абласцях, асабліва на ролі, звязаныя з ШІ, працягнецца найм», — прагназуе эксперт.