У ЗША хочуць вярнуць сеткавы нейтралітэт, які скасаваў Трамп

Пяць гадоў таму гэтыя нормы скасаваў былы прэзідэнт ЗША Дональд Трамп. Самі прынцыпы былі ўсталяваныя ў 2015 годзе. Шырокапалосны інтэрнэт быў прыраўнаваны да іншых камунальных паслуг. Правайдарам забаранілі самавольна блакаваць сайты, кропкава запавольваць трафік або спаганяць дадатковую плату за хутчэйшы доступ да асобных рэсурсаў.

Старшыня FCC Джэсіка Разенворсель асудзіла скасаванне прынцыпаў і назвала пытанне сеткавага нейтралітэту адным з найбольш абмяркоўваных у тэлекамунікацыйнай палітыцы. «Шырокапалосная сувязь з’яўляецца найважнейшым элементам інфраструктуры для сучаснага жыцця. Цяпер доступ да інтэрнэту — гэта доступ да ўсяго», — адзначыла Разенворсель.

Аднаўленне скасаваных нормаў можа заняць нейкі час. Тым не менш яно можа быць аспрэчана правайдарамі ў судовым парадку. Напрыклад, Verizon, AT & T і Comcast выступалі супраць прынцыпаў сеткавага нейтралітэту. Кампаніі сцвярджаюць, што не звяртаюцца да тых дзеянняў, ад якіх улады хочуць абараніць карыстальнікаў.