Спажыванне кантэнту ў ЗША ўступіла ў новую эпоху: упершыню ў гісторыі стрымінг стаў папулярнейшым за кабельнае і эфірнае тэлебачанне разам узятыя, а сацсеткі — галоўнай крыніцай навін, апярэдзіўшы навінавыя выданні.
Спажыванне кантэнту ў ЗША ўступіла ў новую эпоху: упершыню ў гісторыі стрымінг стаў папулярнейшым за кабельнае і эфірнае тэлебачанне разам узятыя, а сацсеткі — галоўнай крыніцай навін, апярэдзіўшы навінавыя выданні.
Паводле дадзеных Nielsen, у маі на стрымінгавыя сэрвісы прыйшлося 44,8% усяго тэлеглядзення ў краіне, тады як доля кабеля і эфіра склала 24,1% і 20,1% адпаведна. Абсалютным лідарам сярод стрымінгавых платформаў стаў Youtube з доляй у 12,5% — амаль удвая больш, чым у Netflix (7,5%), і значна вышэй Disney+ (5%). Гэта ўжо чацвёрты месяц запар, калі доля Youtube ў тэлеглядзенні расце, адлюстроўваючы імклівы пераход моладзі да кантэнту ад незалежных аўтараў.
На фоне папулярнасці Youtube і іншых бясплатных платформаў, такіх як Tubi, Pluto TV і Roku Channel, якія таксама паказваюць упэўнены рост, рынак платных стрымінгавых сэрвісаў таксама застаецца актыўным, але саступае ў тэмпах. У параўнанні з сітуацыяй чатыры гады таму, калі стрымінг займаў толькі чвэрць тэлеглядзення, яго рост склаў 71%.
Тым часам лічбавая трансфармацыя закранула не толькі забавы, але і сферу навін. Паводле справаздачы Reuters Institute за 2025 год, упершыню сацыяльныя сеткі сталі галоўнай крыніцай навін для амерыканцаў. 54% дарослых у ЗША атрымліваюць навіны з сацсетак і відэаплатформаў, тады як толькі 50% — праз тэлебачанне, і 48% — з навінавых сайтаў і праграм.
Асабліва прыкметны гэты зрух сярод моладзі, мужчын, карыстальнікаў з нізкім даверам да традыцыйнай журналістыкі і тых, хто схільны да правых палітычных поглядаў. Акрамя таго, папулярнасць відэакантэнту расце імкліва: 72% амерыканцаў цяпер рэгулярна глядзяць відэанавіны, у параўнанні з 55% у 2021 годзе. Сярод моладзі фармат відэа і падкастаў ужо апярэдзіў тэкст як асноўны спосаб спажывання навін.
Смартфон застаецца асноўнай прыладай для доступу да інфармацыі: 57% амерыканцаў малайдзейшых за 35 гадоў пачынаюць раніцу з прагляду навін на смартфоне. Таксама расце цікавасць да навінавых падкастаў, асабліва да тых, што падаюцца ў фармаце асабістага каментарыя, а не наўпроставай журналістыкі.
Рэлацыраваліся? Цяпер вы можаце каментаваць без верыфікацыі акаўнта.