У Telegram з'явіцца аўтавыдаленне кэшу і хаванне ўдзельнікаў груп

У бэта-версіі для Android выяўленыя спойлеры на файлы. Цяпер пры дасыланні паведамлення з выбарам адпаведнай функцыі медыя будуць засакрэчаныя, праглядзець іх можна будзе толькі па тапе. Таксама з’явіцца магчымасць хаваць удзельнікаў групы (ад 100 удзельнікаў і вышэй), пакінуўшы там толькі адміністратара. Адміністратары пры гэтым змогуць і далей бачыць спіс усіх удзельнікаў.

У абнаўленні таксама з’явяцца публічныя аватары, у наладах прыватнасці можна будзе ўсталяваць публічнае фота профілю, якое будуць бачыць усе карыстальнікі. Для абмежаванага круга будзе даступная асноўная выява профілю, калі яны ўваходзяць у спіс кантактаў або спіс выключэнняў.

У раздзеле «Даныя і памяць» з’явіцца опцыя аўтавыдалення кэшу для асабістых чатаў, груп, каналаў паасобку, а таксама магчымасць дадаваць чаты і каналы ў выключэнні, каб кэш у іх не ачышчаўся. Таксама будзе абноўлены рэдактар медыя, можна будзе адпраўляць у Telegram Desktop фатаграфіі без сціскання памерам 2560 кропак па вялікім баку (цяпер можна да 1280 кропак).