Чаго чакаць ад прэзідэнцтва Трампа тэхнагігантам накшталт Google, Apple і Microsoft

Пераслед

У часе перадвыбарнай гонкі Трамп пагражаў мерамі супраць некаторых тэхналагічных кампаній. Напрыклад, пасадзіць у турму асоб, якія нібыта ўмешваюцца ў выбары, накшталт гендырэктара Meta Марка Цукерберга. Ці стане ён выконваць сваю пагрозу, незразумела.

Таксама ў часе сваёй кампаніі Трамп жорстка крытыкаваў Google. Ён абвінавачваў тэхнагіганта ў махлярстве і спробе паўплываць на выбары праз старонку пошукавай выдачы — у прыватнасці ў тым, што Google не адлюстроўвае станоўчыя матэрыялы пра яго. Ён называў кампанію «вельмі дрэннай» і абяцаў «штосьці зрабіць» з яе ўплывам. У верасні ён пагражаў запатрабаваць ад Мінюста «па максімуме» пераследваць Google.

Мыта

Планы Трампа ўвесці буйныя мыты на замежныя тавары могуць вельмі моцна нашкодзіць амерыканскім тэхналагічным кампаніям.

Эксперты Barclays і Стэнфарда адзначаюць, што дзеянні адміністрацыі Трампа могуць прывесці да адрыву ЗША ад астатняга свету. Разам з увядзеннем гіганцкага мыта гэта будзе мець разбуральныя наступствы для амерыканскіх ІТ-кампаній, якія прадаюць тавары і паслугі на замежных рынках, а таксама ўдарыць па спажыванні ўнутры краіны.

Калі Трамп пачне ўвасабляць у жыццё прапановы, зробленыя ў часе сваёй перадвыбарнай кампаніі, гэта будзе азначаць велізарныя змены ў тым, як рытэйлеры вядуць бізнэс, і прывядзе да значнага павышэння выдаткаў для гэтых кампаній, у тым ліку праз неабходнасць перабудоўваць ланцужкі паставак.

Антыманапольнае рэгуляванне

У дачыненні да тэхнагігантаў, уключаючы Apple, Google, Meta і Amazon, ужо вядуцца антыманапольныя расследаванні. Эксперты Карнельскага ўніверсітэта адзначаюць, што прэзідэнты звычайна не маюць вялікага ўплыву на іх ход — усё залежыць ад суддзяў, судоў і юрыстаў, якія маюць дачыненне да справы, а для адміністрацыі даволі нетыпова неяк уключацца ў іх.

Пры гэтым эксперты адзначаюць, што з Трампам усё вельмі непрадказальна. Прычын умешвацца ў гэтыя справы для Трампа яны не бачаць і не чакаюць ніякіх змен у бягучых антыманапольных справах. Але мяркуюць, што падыход Трампа да антыманапольнага рэгулявання будзе менш агрэсіўным, чым быў бы ў Камалы Харыс. Акрамя таго, справы па самых надзённых праблемах ужо заведзеныя, і падстаў для новых вельмі няшмат. У той жа час шмат што будзе залежаць ад таго, каго Трамп прызначыць генеральным пракурорам на чале антыманапольнага падраздзялення.

Рэспубліканцы традыцыйна лаяльнейшыя да паглынання

Эксперты чакаюць, што пры Трампе будзе адбывацца больш угод па зліцці і паглынанні. Пры Джо Байдэне ў 2023 годзе патрабаванні да такіх угод былі больш жорсткімі. Эксперты лічаць, што пры Трампе гэтыя ўмовы будуць змененыя, але ў цэлым на бігтэх-кампаніі гэта моцна не паўплывае. Апошнія пару гадоў актыўнасць у гэтай сферы была нізкай у сувязі з нізкімі працэнтнымі стаўкамі, а не праз пазіцыю адміністрацыі Байдэна. А вобраз рэспубліканцаў як больш спрыяльных бізнэсу можа не апраўдаць сябе. Пры Трампе, напрыклад, было заблакаванае паглынанне Time Warner кампаніяй AT&T.

Віза H1-B

Адным з цэнтральных пунктаў у праграме Трампа стала праблема міграцыі. Яго перамога на выбарах можа закрануць тэхналагічны сектар, які залежыць ад супрацоўнікаў, што прыязджаюць у ЗША працаваць па візе H1-B, на фоне бітвы кампаній за АІ-спецыялістаў.

Ёсць асцярогі, што калі ў часе другога тэрміну Трампа будзе абмежаваная выдача гэтых віз, то ЗША страцяць лідарства на сусветнай арэне, якое выбудоўвалася гадамі.

На думку экспертаў, няможна забараняць экспарт чыпаў, а потым цалкам «экспартаваць» таленавітых супрацоўнікаў. Яны падкрэслілі, што гендырэктары трох з найбуйнейшых кампаній свету — імігранты.

Некаторыя мяркуюць, што Трамп не стане выконваць свае абяцанні ў гэтым плане, калі зойме сваю пасаду ў студзені. На думку экспертаў, яго адміністрацыя аддасць прыярытэт захаванню пануючага становішча ЗША «любой цаной», нават калі гэта значыць і далей прыцягваць таленты ў краіну па візе H1-B.

АІ

У Трампа няма выразна пазначанай палітыкі ў дачыненні да АІ, хоць ён называў тэхналогію «вельмі небяспечнай». Але эксперты чакаюць, што гэтая палітыка будзе пасіўнейшай, чым была б у выпадку з Харыс.

Адзінае, што паабяцаў Трамп, гэта скасаваць указ Байдэна аб рэгуляванні АІ, развіцці канкурэнцыі і развязанні звязаных з АІ пагроз. На думку новаабранага прэзідэнта, гэты ўказ шкодзіць свабодзе слова.

Гэта будзе мець неадназначныя наступствы для ІТ-кампаній. З аднаго боку, будзе азначаць больш свабоды, менш падсправаздачнасці і бюракратыі. З іншага, кампаніям патрэбная нейкая «дарожная карта», і чым больш гарманізаваная яна будзе, тым лепш.