Viber скарачае ў Мінску і ўпершыню наймае ў Польшчы — пасля блакавання ў Расіі

Viber — адна з апошніх легендарных прадуктовых кампаній, якая, нягледзячы на падзеі апошніх гадоў, працягвала працу ў Беларусі. R&D-офіс у Мінску функцыянуе з 2012 года. У масавай свядомасці — нават сярод людзей, далёкіх ад ІТ — гэты брэнд трывала асацыюецца з беларускім ІТ, нягледзячы на ізраільскія карані.

На пачатку 2025 года ў мінскім офісе працавала каля 150 спецыялістаў. У студзені частку з іх, у тым ліку тых, хто меў шматгадовыя кантракты, кіраўніцтва папярэдзіла аб скарачэннях.

Супрацоўнікі, з якімі devby удалося паразмаўляць на ўмовах ананімнасці, мяркуюць, што гэта «не менш за 5% усёй каманды». Самая папулярная версія: скарачэнні звязаны з аптымізацыяй выдаткаў пасля блакавання Viber у Расіі ў канцы 2024 года — кампанія страціла значную частку карыстальнікаў.

Аднак ёсць і іншыя версіі — за апошні год Viber «сур’ёзна скараціў напрамкі развіцця прадукту. Няма новых праектаў — адпаведна, ёсць і звальненні. Заадно і фінансы аптымізавалі. Думаю, па гэтай жа прычыне ў мінскім офісе скарацілі і гадавыя прэміі».

Менеджмент, як сцвярджаюць крыніцы, у асабістых размовах з тымі, каго планаваў скараціць, выказваў прэтэнзіі да іх працы. Прапаноўвалі сысці «па пагадненні бакоў» і давалі час на пошук новай працы, захоўваючы зарплату на 2 месяцы.

— Мне, напрыклад, паведамілі, што па выніках гадавога рэвью мая ацэнка аказалася не вельмі высокай. Але нікому не тлумачылі канкрэтна і не агучвалі самі ацэнкі. Пры гэтым па працоўных задачах праблем не было, усё запланаванае выконвалася ў тэрмін. І атрымлівалася, што летам па выніках рэвью ўсё добра, а зімой — на мароз.

Адначасова са скарачэннямі ў Мінску Viber фактычна спыніў найм у Беларусі. На сайце размешчана толькі адна вакансія — Content Validation Specialist.

— Наколькі я памятаю, яшчэ ў канцы мінулага года на сайце кампаніі былі вакансіі для працы ў Мінску. Але ўжо ў самым пачатку гэтага года яны зніклі, затое з’явіліся прапановы працы ў Варшаве.

Планы ў Варшаве

Яшчэ ў студзені 2025 года на агульным анлайн-мітынгу супрацоўнікам паведамілі пра планы адкрыць офіс у Польшчы. Дакладныя тэрміны невядомыя — верагодна, гэта адбудзецца на працягу года.

На сёння з’явілася каля 10 вакансій у Варшаве.

— [Некаторыя] Супрацоўнікі мінскага офіса даўно хацелі рэлакавацца ў Польшчу. Пры гэтым частка старых супрацоўнікаў паспела пераехаць туды яшчэ ў 2020 годзе па праграме PBH. Здаецца, у другой палове 2023-га або на пачатку 2024-га топ-менеджары абмяркоўвалі магчымасць адкрыцця офіса ў Польшчы. Чуў, што ў Варшаву нават прыязджала высокае кіраўніцтва з Ізраіля. Але ў выніку сказалі, што гэта занадта дорага — сядзіце або ў Мінску, або ў Грузіі. Падобна на тое, што пасля блакавання Viber у Расіі кампанія перагледзела свае планы, — распавёў адзін з супрацоўнікаў.

У польскі офіс плануюць наняць 50 супрацоўнікаў. Паводле слоў аднаго з суразмоўцаў, ён не чуў пра прапановы рэлакацыі ў Польшчу для супрацоўнікаў мінскага офіса. Іншы суразмоўца адзначыў, што Viber шукае ў польскую каманду тых, хто мае статус індывідуальнага прадпрымальніка (JDG) у Польшчы, і афармляе іх па B2B-кантракце.

Новым супрацоўнікам у Варшаве прапануюць гібрыдны фармат працы. Кампанія абяцае бясплатную паркоўку каля офіса, калі ён з’явіцца (кампенсуе выдаткі ў памеры каля 150 еўра на месяц).

— Ад тых, хто ўжо паспеў атрымаць офер, чуў, што Viber прапануе заробкі ў Польшчы па ніжэйшай мяжы рынку. Акрамя таго, гадавая прэмія ў супрацоўнікаў у Польшчы, верагодна, будзе ніжэйшая, чым у Беларусі, — распавёў суразмоўца.

Лёс мінскага офіса

Пакуль няма прыкмет таго, што Viber збіраецца цалкам згортваць працу ў Беларусі.

Аднак супрацоўнікі не ўпэўненыя ў сваіх доўгатэрміновых перспектывах. Некаторыя чакаюць далейшых скарачэнняў, іншыя — прапаноў аб пераездзе. Папулярнае меркаванне:

— Усё выглядае так, што, ацаніўшы рызыкі пасля блакіроўкі ў РФ, Viber вырашыў паступова перанесці ў Польшчу асноўныя магутнасці па распрацоўцы.

Мы накіравалі пытанні Rakuten Viber наконт будучыні офісаў у Беларусі і Польшчы. Апублікуем адказ, калі атрымаем.