У Беларусі ствараюць «AirBnB для аграсядзіб». Пагутарылі пра праект з фаўндарам
«Рэзервавалі-перарэзервоўвалі, ды не зарэзервавалі», — для кліента лагапеда гэта ўсяго толькі скорагаворка, а для ўладальніка міні-гатэля або аграсядзібы — страшны сон.
Якраз на тое, каб гэта і засталося сном, працуе каманда праекта Vitaem. Хлопцы робяць платформу для кіравання малымі аб’ектамі пасутачнай арэнды.
Сэрвіс прыдуманы, расказвае ягоны заснавальнік Ілля Давыдаў, для ўладальнікаў аграсядзіб, гасцявых дамоў, кватэр, апартаментаў, кемпінгаў і глэмпінгаў, міні-гатэляў. У ім яны могуць аўтаматычна атрымліваць рэзервацыі з дапамогай персанальнага модуля рэзервавання, кантраляваць загрузку ў календары-шахматцы і кіраваць персаналам і каналамі продажаў праз менеджар каналаў.
Іншымі словамі, платформа Vitaem закліканая сінхранізаваць усе календары на розных пляцоўках, — ды так, каб не было перарэзервавання і штрафных санкцый ад пляцовак, і пазбавіць сваіх карыстальнікаў працаёмкага ручнога кіравання, — тлумачыць наш суразмоўца.
— Калі вы маеце адзін гасцявы дамок, то з інструментаў, відаць, можна абмежавацца аркушам паперы, ручкай і старонкай у Instagram, — але калі іх два, пяць або восем, вам патрэбная дапамога.
Пакуль яшчэ не ўсе функцыі рэалізаваныя, шчыра прызнаецца Ілля, але «аўтаматызацыя рэзервавання» ўжо даступная. А ў будучыні, дадае ён, на платформе з’явяцца віртуальныя памочнікі-адміністратары з АІ, віртуальны кансьерж ды «іншыя плюшкі» — «без дадатковых або схаваных камісій, і нават нейкі час бясплатна».
«Каб зразумець, як падысці да распрацоўкі і запусціць праект, скончыў курсы па франтэндзе»
Ідэя і распрацоўка Vitaem — самога Іллі. Ён вось ужо 11 гадоў удзельнічае ў праектах па развіцці агратурызму, сэрвіс задумаў зрабіць яшчэ 3 гады таму, але не ведаў, «як падступіцца да рэалізацыі».
— Я з адукацыі прадзюсар, з ІТ сутыкаўся толькі, калі рабіў карпаратывы для Wargaming, Viber і Synesis, — жартуе маладзён. І далей працягвае ўжо сур’ёзна. — Каб зразумець, як падысці да распрацоўкі і запусціць праект, скончыў курсы па франтэнд-распрацоўцы ў IT-Academy, а затым узяў курс PM у TeachMeSkills. Паралельна збіраў каманду.
Ілля кажа, што знайсці людзей таксама было няпроста — бо грошай на распрацоўку ў яго не было («ані капейкі»). Але ён вырашыў гэтую задачу — пайшоў па ІТ-школах і прыцягнуў іх выпускнікоў.
Цяпер у камандзе 19 чалавек, якія працуюць з трох краін.
— Так, людзей нямала — але яны працуюць над Vitaem у свой вольны час, — у вечары, у выходныя, і «гэта адбіваецца на хуткасці распрацоўкі», — кажа наш суразмоўца.
Каманда працуе так вось ужо 1,5 года. Цяпер выйшлі на фінішную прамую. На гэтым этапе, адзначае Ілля, яны ўжо думаюць пра тое, як запусціць продажы і пачаць аплачваць працу ўсіх, хто працуе на праекце. Наш суразмоўца дадае, што ён таксама разглядае варыянт з прыцягненнем інвестыцый — і «шчыльна працуе над гэтым».
Нядаўна маладзёны выйгралі са сваім праектам «Стартап-марафон» ад Белаграпрамбанка — дакладней, перамаглі ў намінацыі Creative. Прызавы фонд выдаткавалі ў тым ліку на воблачную інфраструктуру — арэнду сервераў і баз даных.
— Пры працы з трэкерамі ў марафоне якраз прыйшлі да высновы, што нам выгадней — пачаць прадаваць свой прадукт і выйсці на пэўны ўзровень продажаў, чым адразу прыцягваць інвестараў, — кажа Ілля.
Днямі стартаваў адбор у акселератар ад ПВТ — і Vitaem трапіў у 20-ку праектаў. «Нашая задача цяпер — паглядзець на праект пад рознымі вугламі і максімальна эфектыўна прапрацаваць, а таксама запусціць працэс манетызацыі і прыцягнення інвестыцый», — адзначае наш суразмоўца.
«Запусцілі камунікацыйную платформу — гэта гадавы цыкл дзеяў»
Тлумачачы, чым унікальны праект Vitaem, Ілля адзначае, што ў Беларусі няма сэрвісаў, аналагічных яму.
— Ёсць воблачныя платформы, а таксама дарагія і складаныя «скрыначныя» рашэнні для гатэляў — але не для маленькіх аб’ектаў, такіх як сядзібы або гасцявыя дамы. Vitaem жа — якраз воблачная PMS-сістэма, заточаная беспасярэдне пад дробных гульцоў пасутачнай арэнды. У кожнага аб’екта ў ёй ёсць свой модуль рэзервавання, які можна прыкруціць да сайта, сацсетак або скідаць спасылку або QR-код.
Цяпер мы распрацоўваем менеджар каналаў, які дазволіць сінхранізаваць календары і асабістыя кабінеты папулярных каналаў продажаў — такіх як «Астравок», «Сутачна», MTC Travel. Спадзяемся, да нас далучацца «Куфар», Holiday.by і «Белкрай», а з часам вернуцца і Booking, AirBnB ды іншыя.
Ілля расказвае, што сумесна з «Белаграпрамбанкам» і плацежнай сістэмай Webpay яны запусцілі асобны тарыф па інтэрнэт-эквайрынгу з паніжанай камісіяй для кліентаў Vitaem.
— А яшчэ мы запусцілі камунікацыйную платформу — гэта гадавы цыкл невялікіх мерапрыемстваў (два на месяц), у рамках якога мы збіраем уладальнікаў сядзіб і кіраўнікоў аб’ектаў размяшчэння ў рэгіёнах, гарадскія ўлады, прадстаўнікоў бізнэсу, экспертаў і наладжваем нэтворкінг-дыялог паміж усімі ўдзельнікамі сустрэчы.
Ілля адзначае, што яго канчатковая мэта — зрабіць не проста прадукт, але запусціць цэлую экасістэму па развіцці гасціннасці.
Читать на dev.by