Візы таленту ў ЗША ўсё часцей атрымліваюць онліфаншчыцы

Паводле слоў нью-ёркскага адваката Майкла Уайлдса, раней яго практыка была звязана з музыкамі і акцёрамі сусветнага ўзроўню, аднак цяпер усё часцей да яго звяртаюцца інфлюэнсеры з TikTok і Instagram. Ён называе новую хвалю кліентаў «каралямі і каралевамі скролу» і прызнае, што рост заявак ад стваральнікаў кантэнту рэзка паскорыўся пасля пандэміі.

Юрысты тлумачаць гэты зрух тым, што ключавыя крытэрыі O-1B — камерцыйны поспех, публічнае прызнанне і вядучая роля ў «значных праектах» — параўнальна лёгка адаптуюцца да лічбавага асяроддзя. Колькасць падпісчыкаў, праглядаў і даходаў ад рэкламы ці падпісак служаць нагляднымі і лёгка правяральнымі метрыкамі. «Звычайнага чалавека лёгка ўразіць вялікім лікам фолаверaў», — адзначае іміграцыйны адвакат Электра Яа.

Напрыклад, колькасць віз O-1 (уключаючы O-1B для мастацтва і O-1A для навукі, бізнесу і спорту) вырасла больш чым на 50% у перыяд з 2014 па 2024 год, тады як агульная колькасць неіміграцыйных віз павялічылася толькі на 10%. Пры гэтым O-1 па-ранейшаму застаюцца нішавай катэгорыяй: у 2024 годзе іх выдалі менш за 20 тысяч — у разы менш, чым працоўных віз H-1B. Дадатковым фактарам ціску на рынак стала рашэнне прэзідэнта Дональда Трампа ўвесці аднаразовы збор у $100 тысяч за новыя петыцыі H-1B.

Гістарычна віза O-1B стваралася для абароны выбітных артыстаў. Цяпер жа, паводле слоў юрыстаў, патрабаванні «перапрашываюцца» пад лічбавую эканоміку ўвагі: ад брэнд-кантрактаў да з’яўленняў на мерапрыемствах, якія залічваюцца як «значныя выступленні».

Аднак такі зрух выклікае і крытыку. Некаторыя адвакаты папярэджваюць, што арыентацыя на алгарытмічныя метрыкі размывае самую ідэю «выключнага таленту». На іх думку, мастакі і выканаўцы з акадэмічнай адукацыяй і укладам у культуру, але без мільёнаў падпісчыкаў, рызыкуюць апынуцца ў нявыгадным становішчы. «Калі мастацкую каштоўнасць пачынаюць вымяраць як лік на табло, гэта ўжо не прыватны трэнд, а структурны зрух», — кажа нью-ёркскі адвакат Шэрвін Абачы.

Інжынер Google адмовіўся ад грын-карты і працы ў ЗША дзеля сваёй справы ў Еўропе

Па тэме

Інжынер Google адмовіўся ад грын-карты і працы ў ЗША дзеля сваёй справы ў Еўропе