Уладальнік Tinder дамовіўся з Google пра спосабы аплаты. Epic Games будзе судзіцца ў адзіночку

Match Group падала пазоў да Google у маі 2022 года, абвінаваціўшы яе ў навязванні сваёй аплатнай сістэмы. Падчас працэсу Google не стала выдаляць праграму распрацоўшчыка з Google Play, наўзамен Match Group пералічыла да $40 мільёнаў замест аплаты камісій напрамую. Затым Google падала сустрэчны пазоў, абвінаваціўшы Match Group у парушэнні ўмоў кантракта і нядобрасумленных паводзінах.

Таксама Match Group аб’яднала свой пазоў з падобным пазовам Epic Games. Разгляд справы меўся прайсці 6 лістапада, аднак за тыдзень да гэтага распрацоўшчык Tinder змог дамовіцца з Google. Цяпер уладальнік крамы праграм верне $40 мільёнаў. 31 сакавіка 2024 года Match Group зможа ўкараніць механізм выкарыстання іншых плацежных сістэм.

Згодна з дамоўленасцямі, калі карыстальнік абярэ сістэму Google, то Match будзе плаціць Google 15% за падпіскі і 30% за разавыя плацяжы. Пры аплаце праз альтэрнатыўную сістэму распрацоўшчыка доля Google зніжаецца да 11% і 26% адпаведна. Цяпер Epic Games будзе судзіцца з Google у адзіночку.