У Францыі прынялі закон, які дазваляе паліцыі аддалена ўключаць камеры і мікрафоны на тэлефонах людзей

Карыстацца такімі паўнамоцтвамі паліцыя зможа толькі з дазволу суда. На журналістаў, адвакатаў і прадстаўнікоў іншых «адчувальных» прафесій новы закон не распаўсюджваецца.

Новая мера будзе прымяняцца толькі ў сур’ёзных кейсах і не даўжэй за 6 месяцаў. Адсочваць месца знаходжання паліцыя зможа толькі ў тых выпадках, калі падазраванаму пагражае ад 5 гадоў турмы.

Ніжняя палата французскага парламента зацвердзіла адрэдагаваную версію закона. Ранейшая ўжо прайшла Сенат, але праз папраўкі закон меўся быць ухвалены паўторна.

Навіной — і рызыкамі злоўжывання ёй — ужо занепакоіліся праваабаронцы. Паводле іх слоў, у законе няма дакладнага вызначэння «сур’ёзнага злачынства». Яны асцерагаюцца, што ўлады будуць выкарыстоўваць новы закон супраць экаактывістаў ды іншых людзей, якія насамрэч не з’яўляюць пагрозы. Праваабаронцы адзначаюць, што падобныя меры з часам пачынаюць задзейнічацца і ў выпадку несур’ёзных злачынстваў. Акрамя таго, паліцыя можа эксплуатаваць уразлівасці бяспекі ў карыстальніцкіх прыладах замест таго, каб паведамляць пра іх вытворцам.

У Мінюсце краіны запэўнілі, што новыя магчымасці сачэння будуць прымяняцца толькі ў «дзясятках» выпадкаў на год і што гэта дапаможа выратаваць чалавечыя жыцці.