Крама Windows стала бясплатнай для распрацоўшчыкаў — усе камісіі адмянілі

Раней кампанія спаганяла аднаразовую плату ў $19 за рэгістрацыю, аднак цяпер ад яе цалкам адмовілася. Для параўнання: Apple працягвае браць $99 штогод, а Google — $25 аднаразова. Па словах старэйшага менеджара прадукту Microsoft Чэтны Дас, адмена збораў «ліквідуе ключавы бар’ер і робіць платформу больш даступнай для стваральнікаў па ўсім свеце».

Распрацоўшчыкі могуць публікаваць Win32, UWP, PWA, .NET MAUI, Electron і іншыя праграмы. Microsoft бярэ на сябе хостынг і лічбавы подпіс праграм, а таксама аўтаматычнае абнаўленне праз Windows. Для негульнявых праграм распрацоўшчыкі могуць выкарыстоўваць уласныя сістэмы аплаты і пакідаць сабе 100% даходаў.

Крама праграм Windows актыўна развіваецца з рэдызайну 2021 года. Яна ўжо налічвае больш за 250 мільёнаў актыўных карыстальнікаў у месяц, і Microsoft разлічвае, што зняцце бар’ераў прыцягне яшчэ больш стваральнікаў. Каб пачаць, распрацоўшчыку дастаткова аўтарызавацца ў новым інтэрфейсе анбордынгу і прайсці верыфікацыю асобы — скан пашпарта і сэлфі абавязковыя.