Николай Чикишев 27 кастрычніка 2022, 21:40

WSJ: у Сербію ад пачатку вайны ва Украіне прыехала не менш за 50 тысяч расійцаў

Сербія стала адной з асноўных краін, куды пачалі з’язджаць расійскія грамадзяне пасля пачатку вайны ва Украіне.

Паводле звестак The Wall Street Journal, большасць расійцаў накіроўвалася ў Турцыю, ААЭ, Грузію, аднак цяпер многія сталі выбіраць Сербію. Выданне адзначае, што апошнімі месяцамі ў краіну прыехалі «дзясяткі тысяч» расійскіх інжынераў, праграмістаў, прадпрымальнікаў, дзеячаў мастацтва і навукоўцаў.

Паводле ацэнак экспертаў, ад лютага ў Сербію прыехала не менш за 50 тысяч расійцаў, але не больш за 100 тысяч. Паводле прыкладных падлікаў, у Казахстан ад 21 верасня заехала каля 98 тысяч расійцаў, у Грузію — 53 тысячы, у Фінляндыю — 43 тысячы. Таксама ў Сербіі адкрылі філіялы каля 700 звязаных з Расіяй кампаній, каля 1,5 тысячы грамадзян Расіі зарэгістравалі ў краіне новы бізнэс. Некаторыя кампаніі (Luxoft, Wargaming і інш.) перавялі частку супрацоўнікаў у Сербію.