Youtube блакуе прагляд відэа ў Microsoft Edge

Браўзер усталяваны па змаўчанні ў апошніх версіях Windows. Ён абсталяваны ўбудаванай функцыяй абароны, якая абмяжоўвае магчымасці адсочвання дзеянняў карыстальніка. Абарона прапануе тры рэжымы: «базавы», «збалансаваны» і «строгі».

• «Базавы» рэжым скіраваны на супрацьдзеянне шкодным трэкерам і надае асаблівую ўвагу такім пагрозам, як збор лічбавых адбіткаў пальцаў (фінгерпрынтынг) і крыптамайнінг. Гэты рэжым не блакуе рэкламы;
• «Збалансаваны» рэжым уключаны па змаўчанні і не блакуе рэкламы. Ён створаны для карыстальнікаў, якім патрабуецца менш персаналізаванай рэкламы і мінімальныя перашкоды пры працы;
• «Строгі» рэжым створаны для тых, каму важная канфідэнцыйнасць. Ён забяспечвае максімальна магчымае прадухіленне адсочвання. Кампанія сцвярджае, што рэжым можа «мінімальна ўплываць на рэкламу», але цалкам яе не блакуе.

Карыстальнікі браўзера Edge заўважылі, што пры выбары «строгага» рэжыму Youtube блакуе прагляд відэа. Для працягу прагляду трэба адключыць абарону або пераключыцца на «збалансаваны» рэжым.

На думку Google, блакіроўшчыкі рэкламы «парушаюць умовы абслугоўвання Youtube». «Вы мусіце дадаць Youtube у выключэнні або зусім адключыць блакаванне рэкламы, каб працягнуць прайграванне відэа. Рэклама забяспечвае глабальны доступ да Youtube. Каб працаваць без рэкламы, карыстальнікі могуць выбраць Youtube Premium, гарантуючы, што стваральнікі кантэнту па-ранейшаму будуць атрымліваць узнагароду».