YouTube прэзентаваў новыя спосабы манетызацыі для аўтараў

Адным з ключавых запускаў стала сістэма Ask Studio — чат-бот, які аналізуе дадзеныя канала і дапамагае аўтарам прымаць рашэнні на аснове статыстыкі. Інструмент здольны выяўляць самыя ўдалыя моманты ролікаў, збіраць глядацкія каментары, прапаноўваць ідэі для новых відэа і нават даваць парады па аптымізацыі кантэнту.

Youtube таксама абнавіў функцыю A/B-тэставання, якая цяпер дазваляе адначасова параўноўваць загалоўкі і вокладкі відэа. Гэта павінна дапамагчы аўтарам дакладней разумець, якія фарматы прыцягваюць гледачоў і ўтрымліваюць іх увагу.

Для абароны аўтараў кампанія пашырыла доступ да інструмента Likeness Detection, які дазваляе выяўляць і выдаляць відэа з несанкцыянаваным выкарыстаннем іх твару ці вобраза. Гэтая функцыя цяпер даступная ўсім удзельнікам партнёрскай праграмы Youtube.

Істотныя абнаўленні закранулі і функцыю аўтаматычнага дублявання. Цяпер перакладзеныя відэа сінхранізуюцца з рухам вуснаў аўтара, што робіць ролікі больш натуральнымі. Кантэнт, створаны з дапамогай аўта-дублявання, будзе пазначаны спецыяльным цэтлікам.

Кароткія відэа Shorts атрымалі інтэграцыю з генератыўнай мадэллю Veo 3 Fast, якая дазваляе ствараць кліпы з музыкай, ажыўляць статычныя выявы і ўжываць стылізаваныя эфекты. Таксама з’явіўся новы сродак для рэміксаў, які ператварае фразы з іншых ролікаў у саўндтрэкі.

Для стрымаў Youtube запусціў, па ўласных словах, «самае буйное абнаўленне Live за ўсю гісторыю платформы». Цяпер аўтары змогуць весці трансляцыі адначасова ў гарызантальным і вертыкальным фарматах, гуляць ва ўбудаваныя міні-гульні, выкарыстоўваць аўтаматычныя ШІ-хайлайты і пераключацца на трансляцыі толькі для падпісчыкаў без перапынення эфіру.

Не засталася без увагі і манетызацыя. Youtube укараніў новыя гнуткія фарматы для брэндавых інтэграцый: цяпер аўтары змогуць устаўляць рэкламныя блокі ў слоты, якія ў далейшым можна замяніць іншымі партнёрамі. Акрамя таго, пашыраецца праграма Youtube Shopping, дзе ўжо ўдзельнічаюць больш за паўмільёна стваральнікаў.

Фармат відэа не падтрымліваецца

Фармат відэа не падтрымліваецца