YouTube цяпер можа ператвараць фота ў відэа

У Google Фота з’явілася функцыя Photo to video, заснаваная на мадэлі Veo 2: яна дазваляе згенераваць шасцісекундны відэаролік з адной фатаграфіі, выбраўшы адзін з промптаў — «Subtle movements» ці «I’m feeling lucky». Таксама ў сэрвісе неўзабаве стане даступная функцыя Remix, з дапамогай якой можна змяняць стыль фота, напрыклад, ператвараць здымак у комікс ці анімэ.

Падобныя інструменты з’явіліся і ў рэдактары кароткіх відэа Youtube Shorts. Цяпер карыстальнікі ў ЗША, Канадзе, Аўстраліі і Новай Зеландыі могуць ствараць ролікі з фота, тэкставых апісанняў ці простых малюнкаў. Новыя ШІ-эфекты, такія як «пагружэнне пад ваду», а таксама функцыя аўтагенерацыі каляровых выяваў з нарысаў ужо даступныя ў аплікацыі.

Яшчэ адна навінка — платформа AI Playground, якая дазваляе ствараць не толькі відэа, але і музыку ці выявы па тэкставым запыце. Увесь згенераваны з дапамогай ШІ кантэнт будзе пазначацца адпаведнай адзнакай пры публікацыі ў Shorts.

Google адзначае, што новыя функцыі працуюць на мадэлі Veo 2, а гэтым летам платформа пяройдзе на новую версію — Veo 3, якая абяцае яшчэ больш якасную генерацыю відэа. Маштабнае абнаўленне ўжо даступна ў ЗША і шэрагу краін, а да іншых рэгіёнаў дойдзе на працягу 2025 года.