40% для самых даходных беларусаў і большы падатак для буйной нерухомасці. Якія новаўвядзенні могуць чакаць у хуткай будучыні

У 2024 годзе даходы фізасоб, якія перавышаюць 200 тысяч рублёў у год, сталі абкладацца падаткам па стаўцы 25%. На 2025 год парог даходаў быў павышаны да 220 тысяч рублёў. Цяпер прапануецца павялічыць яго да 350 тысяч, а даходы звыш 600 тысяч абкладаць падаткам у 40%.

Раней міністр па падатках і зборах Дзмітрый Кійко адзначаў, што самая высокая стаўка закране толькі каля тысячы чалавек. Міністр фінансаў Юрый Селіверстаў паўтарыў гэта на днях у эфіры тэлеканала «Першы інфармацыйны» і падкрэсліў, што даплата ў казну можа скласці сотні мільёнаў рублёў. Па тэрмінах ён сказаў, што «гэта будзе ў 2027-м, калі нас падтрымаюць», і чамусьці адзначыў, што «павышэнне падаходнага падатку для ўсіх грамадзян у дадзеным выпадку не апраўдана». Памер планаванай павышанай стаўкі ён не назваў.

Акрамя гэтага, таксама каб «забяспечыць пэўную справядлівасць», плануецца перагледзець падаткі на маёмасць і нерухомасць, паведаміў Селіверстаў. Для ўладальнікаў кватэр больш за 150 кв. м. у 2026 годзе могуць усталяваць каэфіцыент 2, а для кватэр больш за 250 кв. м. — каэфіцыент 3. «Гэта дазволіць для такога жылля кошт квадратнага метра, з якога лічыцца падатак, крыху больш падцягнуць да яго рэальнага кошту», — цытуе міністра БелТА.

Ён дадаў, што аналагічны падыход прапануюць выкарыстоўваць для прыватных жылых дамоў. «Гэта значыць на дамы больш за 200 кв. м. будзе некалькі павышаная стаўка, калі звыш 300 кв. м. — яшчэ вышэй», — дадаў кіраўнік фінансавага ведамства. Пад гэты крытэр, па яго словах, падпадае каля 27 тысяч падаткаплацельшчыкаў.