Затрыманне Дурава можа разбурыць планы Telegram на IPO

Згодна з рашэннем суда, Дураву забаронена пакідаць Францыю. Для кампаніі гэта вялікая праблема: фармальна штаб-кватэра Telegram значыцца ў Дубаі, і кампанія планавала пашыраць сваю прысутнасць у Эміратах. У сакавіку Дураў заявіў у інтэрв’ю, што плануе правесці IPO, але адхіліў прапановы інвестараў з ацэнкай кампаніі ў $30 мільярдаў.

Даход Telegram летась склаў $342 мільёны пры аперацыйных стратах у $108 мільёнаў. З выплатай падаткаў агульныя страты склалі $173 мільёны. Кіраўніцтва кампаніі імкнулася зрабіць праект фінансава самадастатковым: для гэтага развівалі розныя напрамкі манетызацыі, уводзілі падпіску і рэкламу, запусцілі рэкламную платформу.

Даўгавыя забавязанні кампаніі ў памеры $ 2,4 мільярда павінны быць пагашаныя ў 2026 годзе. Гэта $1 мільярд аблігацый, выпушчаных у 2021 годзе, а таксама $330 мільёнаў, якія паступілі ў гэтым годзе. Сам Дураў набыў аблігацыі на суму не меншую за $64 мільёны. Паперы каштавалі $0.96 да затрымання бізнэсоўца, пасля каціроўкі апусціліся да $0,87.

Кампаніі ўдалося кампенсаваць страты за кошт лічбавых актываў, якія знаходзяцца на балансе. Яны ацэньваюцца амаль у $400 мільёнаў. У гэтым годзе Telegram прадаў звязаную з платформай крыптавалюту на суму большую за $244 мільёнаў. Калі лістынг кампаніі адбудзецца да сакавіка 2026 года, у трымальнікаў аблігацый будзе шанец канвертаваць незабяспечаны доўг у акцыі са зніжкай.

Незразумела, якім чынам Дураў будзе кіраваць кампаніяй, знаходзячыся ў Францыі. Паводле слоў бізнэсмена, у штаце кампаніі лічыцца каля 50 чалавек, з іх 30 супрацоўнікаў — праграмісты, якія прайшлі вельмі строгі адбор. Цякучка практычна адсутнічае, і звальненні ў Telegram — рэдкасць. Таксама вядома, што ўсе новыя функцыі месенджара запускаюць пры непасрэдным удзеле самога Дурава.