У верасні айцішнікі атрымалі максімальны за паўгода заробак у валюце

Заробак айцішнікаў у рублях расце трэці месяц запар. Паводле звестак афіцыйнай статыстыкі, у верасні сярэдні заробак у ІТ (да выплаты падаткаў) склаў 6970,3 рубля. У параўнанні з вераснем мінулага года ён упаў на 0,8%, але адносна жніўня гэтага года вырас на 1,5%.

Адзначым, што вераснёўскі заробак айцішнікаў у рублях — самы вялікі за пяць месяцаў.

У валюце сярэдні заробак за верасень склаў 2 184 долары (брута, па сярэднім курсе Нацбанка). Ён вырас на 1,2% у параўнанні з вераснем мінулага года і на 0,3% адносна жніўня гэтага года.

Пры гэтым вераснёўская зарплата айцішнікаў у доларах выйшла максімальнай за апошнія паўгода. У цэлым сёлета толькі ў сакавіку і красавіку яна была вышэйшай за вераснёўскую.