Заробак айцішнікаў у Беларусі расце чацвёрты месяц запар
У Беларусі працягвае расці сярэдні заробак айцішнікаў. У кастрычніку ўпершыню за апошнія паўгода ён пераадолеў планку ў 7 тысяч рублёў. Верагодна, уплывае ў тым ліку долар, які даражэе і да якога па-ранейшаму прывязаныя заробкі шмат у якіх ІТ-кампаніях.
Паводле звестак афіцыйнай статыстыкі, у кастрычніку сярэдні заробак у ІТ (да выплаты падаткаў) склаў 7205,7 рубля. У параўнанні з кастрычнікам мінулага года ён вырас 4,5%, адносна верасня гэтага года вырас на 3,3%.
Кастрычніцкі заробак увайшоў у топ-3 самых высокіх заробкаў у ІТ сёлета. Толькі ў сакавіку (за кошт гадавых бонусаў) і лютым сярэдні заробак айцішнікаў быў вышэйшым.
Заробак у ІТ у рублях расце чацвёрты месяц запар. Гэта можа быць звязана як з пераглядамі заробкаў у ІТ-кампаніях, так і з ростам курса долара. За апошнія тры месяцы сярэдні курс долара падаражэў на 4% і склаў па выніках кастрычніка 3,2845. Гэта максімальны курс сёлета.
У лістападзе долар працягвае абнаўляць рэкорды. На таргах на Беларускай валютна-фондавай біржы 25 лістапада долар падаражэў да 3,4682. Пры гэтым у некаторых банках курс продажу долара дасягнуў псіхалагічнай адзнакі ў 3,5 рубля.
Што тычыцца сярэдняга заробку ў ІТ у валюце, то за кастрычнік ён склаў 2193,8 долара (брута, па сярэднім курсе Нацбанка). Ён вырас на 4,5% у параўнанні з кастрычнікам мінулага года і на 0,4% адносна верасня гэтага года.
Кастрычніцкі заробак — максімальны ў ІТ за апошнія сем месяцаў. Таксама ён уваходзіць у топ-3 самых высокіх за той год.
Читать на dev.by