На мяжы аншлаг — праз якія КПП лепш ехаць, пакуль усе рванулі на святы ў ЕС

У пунктах пропуску на выезд з Беларусі ў краіны ЕС — кіламетровыя чэргі з аўтамабіляў і аўтобусаў. Хоць і да святаў сітуацыя была так сабе.

Польшча

• Час чакання на мяжы на асабістым аўто: 17-20+ гадзін
• Час чакання на мяжы на аўтобусе: 20-30 гадзін

Паводле даных Дзяржпагранкамітэта, на 8:00 раніцы 9 мая выезду з Беларусі чакалі каля 400 легкавых аўтамабіляў і 79 аўтобусаў.

Мяркуючы з паведамленняў карыстальнікаў у чатах, якія едуць у Польшчу на асабістым аўто, у апошнія дні рэдка ў каго атрымлівалася прайсці абедзве мяжы хутчэй за 17 гадзін.

Час праходжання дзвюх межаў на аўтобусах можа займаць каля сутак. Аднак тут ёсць нюансы.

Як сцвярджаюць некаторыя карыстальнікі, «турыстычны аўтобус можа стаяць значна даўжэй, чый рэйсавы» (рэйсавыя ідуць у асобную чаргу).

Акрамя таго, многія пасажыры, каб скараціць час чакання на мяжы, перасаджваюцца са сваіх аўтобусаў у аўтобусы, якія знаходзяцца максімальна блізка да шлагбаума. Прычым нярэдка такі працэс міграцыі ініцыююць самі кіроўцы аўтобусаў. 

«Экалайн часта перасаджвае ў бліжэйшыя аўтобусы, асабліва ў каго білет на самалёт або перасадка ў Варшаве».

«У рэйсавыя аўтобусы перасаджваюцца пасажыры з турыстычных. Пры мне 3-4 першыя аўтобусы былі забітыя, побач стаялі турыстычныя — паўпустыя».

Паводле разлікаў карыстальнікаў, такая міграцыя з аднаго аўтобуса ў іншы можа зэканоміць каля 10 гадзін. Тыя, хто не перасаджваецца, рызыкуюць выдаткаваць на дарогу больш за 35 гадзін. 

Але трапіць у аўтобусы, якія стаяць бліжэй да шлагбаума, можна толькі пры наяўнасці свабодных месцаў. Да таго ж сама паслуга не бясплатная.

Зрэшты, некаторыя лічаць, што перасадка з аднаго аўтобуса ў другі — не самы аптымальны варыянт для тых, хто едзе ў Польшчу. І раяць разгледзець варыянт праезду праз беларуска-латвійскую мяжу.

Вось як апісала свой вопыт адная з карыстальніц.

«У мяне быў квіток на 6 мая на аўтобус „Мінск-Беласток“. Пачытала чаты, паспела зрабіць страхоўку і 7 мая ў 16:50 выехала з Мінска на аўтамабілі. КПП „Грыгароўшчына — Патэрніекі“ прайшла за 9,5 гадзін. Прыкладна, а 12 дня 8 траўня была ў Беластоку. Крыху даўжэй ехала б да Варшавы, крыху менш — да Вільні. Квіток здаць не атрымалася. Але я б ні за што не паехала праз Брэст на аўтамабілі, каб стаяць суткі, або на аўтобусе, каб стаяць у чарзе».

Адзін з карыстальнікаў таксама параіў «маніторыць літоўскую мяжу» тым, хто збіраецца ў Польшчу на аўтобусе. А вось тым, хто на машыне, такі варыянт не падыдзе, бо ў КПП «Брэст-Тэрэспаль» вышэйшая прапускная здольнасць.

Літва

• Час чакання на мяжы на асабістым аўто: 15-20+ гадзін
• Час чакання на мяжы на аўтобусе: 4-6+ гадзін

Паводле звестак Дзяржпагранкамітэта, на 9:00 раніцы 9 траўня выезду з Беларусі чакалі больш за 350 легкавых аўтамабіляў (сумарна ў двух пунктах пропуску). Пры гэтым інфармацыя пра чаргу аўтобусаў адсутнічае.

Мяркуючы з інфармацыі з чатаў, аўтобус быў самым аптымальным варыянтам выехаць з Беларусі ў Літву апошнімі днямі. Каму шанцавала, абедзве мяжы праходзілі адносна аператыўна.

Вось як апісваюць свой вопыт тыя, хто ехаў у Літву праз КПП «Каменны Лог — Меднікі». 

«Ехалі ў Вільню аўтобусам. Мяжу амаль праляцелі, калі не лічыць двух пасажыраў, якія затрымалі аўтобус на 35 хвілін праз дэклараванне грошай».

«На аўтобусе атрымалася так. У 13:20 заехалі ў РБ, у 14:30 былі на выездзе з РБ. Гадзіну прастаялі пад шлагбаумам на ўездзе ў Літву. У 15:30 заехалі ў Літву, у 16:00 вольныя».

Што праўда, сёння ў чатах сталі з’яўляцца паведамленні пра вялікія затрымкі руху аўтобусаў. Усё праз пастражэнне праверак. Некаторым пасажырам пасля праверкі забаранілі ўезд у Літву.

Карыстальнікі звязваюць пастражэнне праверак з увядзеннем Літвой на пачатку мая дадатковых мер пропуску грамадзян Беларусі. Літоўскія спецслужбы заяўляюць пра ўзрослую актыўнасці беларускіх спецслужбаў па вярбоўцы грамадзян Беларусі.

«Пры перасячэнні мяжы грамадзяне Беларусі будуць падвяргацца дадатковай ацэнцы рызыкі ў сувязі з пагрозай іх уезду і, пры неабходнасці, больш дбайнай праверцы», — гаворыцца ў заяве літоўскага Сейма.

У чатах пішуць пра тое, што літоўскія памежнікі могуць чапляцца да турыстычных віз, удакладняць інфармацыю пра грошы, рэзервацыі гатэля, а таксама пра зваротныя квіткі. Нібыта былі выпадкі, калі не пускалі ў Літву праз адсутнасць квітка на самалёт. Некаторыя карыстальнікі пішуць, што возяць з сабой дамову на працу.

Што тычыцца праходжання межаў на асабістым аўто (пры выездзе з Беларусі ў Літву), то ў кагосьці гэта заняло 15-17 гадзін, у кагосьці 20-26 гадзін. Цяпер кіроўцы пішуць, што перасячэнне мяжы будзе займаць больш за суткі. 

Латвія

• Час чакання на мяжы на асабістым аўто: 6-18+ гадзін

Паводле даных Дзяржпагранкамітэта, на 8:00 раніцы 9 мая выезду з Беларусі чакала больш за 100 легкавых аўтамабіляў. Пры гэтым інфармацыя пра чаргу аўтобусаў адсутнічае.

У чатах мы не знайшлі інфармацыі пра вопыт выезду з Беларусі ў Латвію на аўтобусе за апошнія дні. 

А вось сітуацыя з перасячэннем межаў на асабістым аўтамабілі, мяркуючы з паведамленняў карыстальнікаў, пагаршаецца. Яшчэ 8 мая ў чатах кіроўцы расказвалі, што перасячэнне мяжы займала 6-8 гадзін. Ужо сёння з’явіліся паведамленні пра 12, 15 і 18 гадзін. 

Даныя маніторынгу таксама пацвярджаюць рост колькасці легкавых аўтамабіляў увечары 8 мая.

Час чакання — большы за суткі. Што адбываецца на польскай мяжы

Па тэме

Час чакання — большы за суткі. Што адбываецца на польскай мяжы

МУС ужо збірае інфармацыю пра тых, хто перасякае мяжу з РФ?

Па тэме

МУС ужо збірае інфармацыю пра тых, хто перасякае мяжу з РФ?

«У Калінінградзе было непрыемнае пытанне». Як беларусы едуць дадому праз трэція краіны

Па тэме

«У Калінінградзе было непрыемнае пытанне». Як беларусы едуць дадому праз трэція краіны