Алеся Чапкевич world 22 мая 2026, 15:45

Meta уціхую запусціла канкурэнта Reddit

Meta запусціла новы дадатак Forum, створаны на базе Facebook Groups. Па сутнасці, Марк Цукерберг вырашыў ператварыць назапашаныя гадамі абмеркаванні, парады і гіды з груп у паўнавартаснага канкурэнта Reddit, піша Digital Trends.

1 каментарый

Meta запусціла новы дадатак Forum, створаны на базе Facebook Groups. Па сутнасці, Марк Цукерберг вырашыў ператварыць назапашаныя гадамі абмеркаванні, парады і гіды з груп у паўнавартаснага канкурэнта Reddit, піша Digital Trends.

Ідэя Forum — пазбавіць карыстальніка ад неабходнасці капацца ў перагружанай асноўнай стужцы Facebook дзеля аднаго карыснага адказу. Дадатак збірае лакальныя рэкамендацыі, абмеркаванні хобі і трэды ўзаемадапамогі ў чыстай, структураванай прасторы. Пакуль бясплатны сервіс з’явіўся ў рэжыме публічнага тэставання толькі ў амерыканскім App Store.

Дадатак пабудаваны вакол пытанняў і адказаў з нішавых супольнасцяў, але з акцэнтам на ШІ. Унутры працуе бэта-версія функцыі «Ask»: ШІ можа імгненна выцягваць адказы са старых групавых перапісак, рабіць кароткія выжымкі па тэмах, падсвечваць важныя дыскусіі і дапамагаць адмінам кіраваць супольнасцю. Праўда, эксперты ўжо бачаць у гэтым рызыку — калі нейрасетка ператворыць жывы чалавечы вопыт і унікальныя асабістыя парады ў прэсныя аўтаматычныя самары, платформа страціць сваю лампавасць.

Forum намёртва прывязаны да мацярынскай сеткі. Уваход у дадатак ідзе праз існуючы акаўнт Facebook, адкуль падцягваюцца ўсе профільныя дадзеныя і падпіскі. З аднаго боку, гэта дае праекту каласальны фокус на старце — дадатку не трэба чакаць, пакуль карыстальнікі напоўняць яго кантэнтам, бо за плячыма велізарны архіў пастоў. З іншага боку, тыя, хто спадзяваўся на поўную канфідэнцыяльнасць і незалежнасць ад экасістэмы Цукерберга, будуць расчараваныя.

Пакуль Forum — хутчэй эксперымент, чым паўнавартасны забойца Reddit. Цяпер незразумела, ці з’явіцца дадатак на Android, ці выйдзе за межы ЗША і ці зможа рэальна спрасціць пошук інфармацыі.