Журналіст выдаліў усе аплікацыі са свайго смартфона — вынік яго здзівіў

Паводле слоў Лопеса, ідэя прыйшла пасля шэрагу асабістых перамен: «Я разышоўся з людзьмі і звычкамі, якія мяне вымотвалі. І зразумеў, што галоўная таксічная сувязь заўсёды была побач — у маёй кішэні». Лопес прызнаецца, што менавіта смартфон «дыктаваў, як я праводжу час, як размаўляю і нават як думаю».

«Я выдаліў усё — Instagram, TikTok, X, LinkedIn, Spotify, нават пошту і карты. На тэлефоне засталіся толькі званкі і SMS. Я хацеў, каб ён перастаў быць смартфонам», — кажа ён.

Першыя дні аказаліся цяжкімі. «Я лавіў сябе на тым, што вялікі палец аўтаматычна цягнецца туды, дзе раней быў Instagram. У аўтобусе, у чарзе за кавай, нават у ванным пакоі — я адкрываў тэлефон і бачыў толькі пусты экран. Гэта была сапраўдная ломка».

Але неўзабаве звычка пачала змяняцца. «Я стаў заўважаць, як размаўляюць людзі ў метро. Я звярнуў увагу на тое, як святло падае ў маю кватэру па раніцах. Замест кароткага паведамлення ў WhatsApp я патэлефанаваў бацькам па FaceTime. І гэтыя размовы былі цяплейшыя і даўжэйшыя».

Праз тыдзень ён вярнуў толькі некалькі сэрвісаў — карты, банк, WhatsApp і браўзер. «Але я так і не паставіў назад Instagram, TikTok або X. Пошту і LinkedIn я правяраю толькі на кампутары. Гэтае размежаванне выявілася выратавальным».

Сёння ён называе эксперымент новай звычкай: «Я сплю лепш. Я пачынаю дзень са сваіх думак, а не з чужых пастоў. Мае размовы з сябрамі сталі глыбейшымі, бо я не адцягваюся кожныя пяць хвілін. Чым менш аплікацый, тым лягчэй я сябе адчуваю».

Вынік, паводле слоў Лопеса, аказаўся нечакана простым: «Выдаліўшы таксічныя аплікацыі, я зрабіў месца для чагосьці іншага — для больш спакойнай, яснай і сумленнай версіі самога сябе».